दुर्घटनाको नौ महिनापछि गृहजिल्ला पुगे चन्द्र भण्डारी

रुपन्देही । नेपाली कांग्रेसका केन्द्रीय सदस्य तथा गुल्मी क्षेत्र नम्वर १ का प्रतिनिधि सभा सदस्य डाक्टर चन्द्रकान्त भण्डारी आगलागीमा परेर गम्भीर दुर्घटना परेपछि पहिलोपटक गृहजिल्ला गुल्मी पुगेका छन् । नेपाली कांग्रेस गुल्मीको दोस्रो जिल्ला सम्मेलनको उद्घाटन सत्रलाई सम्बोधन गर्न उनी पुगेका हुन् ।

गत फागुन ३ गते काठमाण्डौंस्थित निवासमा ग्यास सिलिण्डर जलेर विष्फोट हुँदा उनकी आमाको मृत्यु भएको थियो भने भण्डारी गम्भीर घाइते भएका थिए । घाइते भण्डारीको भारतमा लामो समय उपचारपछि नेपाल फर्केपनि गृहजिल्ला जान सकेका थिएनन् । करिव ९ महिना लामो उपचारपछि पहिलो पटक गृहजिल्लाको सार्वजनिक कार्यक्रममा उनी सहभागी भएका हुन् ।

नेता भण्डारीले आफू गम्भीर घटनामा परेका बेला जिल्लावासी, आफ्ना पार्टीका कार्यकर्ता, शुभेच्छुकहरुले देखाएको अपार स्नेहको ऋणि भएको बताउँदै जसरी पनि यो अवसरमा सम्बोधन गर्न जानुपदर्दछ भनेर आएको बताए ।

शुक्रबार अर्घाखाँची र शनिबार गुल्मीको पार्टीको जिल्ला सम्मेलनमा भण्डारी सम्बोधन गर्दै भण्डारीले घटनाको दिन भएका गतिविधि आफूलाई विश्वासै नलागेको समेत बताए । उनले भने–त्यहाँ विष्फोट हुनेगरी केही देखिएको थिएन, सिलिण्डर लिक पनि भएको थिएन, कसरी भयो सबैलाई आश्चर्यमा पारेको छ ।’

गुल्मीको सम्मेलनमा बोल्दै भण्डारीले नेपालको रोग नै भ्रष्टाचार भएको भन्दै त्यी भ्रष्टाचारीहरुलाई ठेगान नलगाएसम्म विकास सम्भव नभएको बताए ।

भ्रष्टाचार गर्ने ब्यक्तिलाई तीन पुस्ता पछिसम्म पनि नछाडने उनले उद्घोष गरे । शक्तिको आडमा रहेर भ्रष्टाचार गर्ने छुट कसैलाई पनि नभएको बताएका छन् ।

पछिल्लो समय राजनीतिमा ब्यक्तिवादी हावी भएको भन्दै देशको चिन्ता गर्ने दल र नेता नभएको भन्दै उनले चिन्ता ब्यक्त गरे । ब्यक्तिवादी हावी रहँदा देशको विकास नहुने उनको तर्क छ । नेपाली कांग्रेस गुल्मीको २ दिनसम्म चल्ने सम्मलेनले गुल्मी घोषणा जारी गर्दै आइतबार सकिनेछ ।