मेस्सीले श्रीमती रोक्कुजोलाई ‘चिट’ गरेको ब्राजिलियन मिडियाको दाबी

काठमाडौं । लियोनल मेस्सी र एन्टोनेला रोक्कुजो आदर्श जोडी मानिन्छन् । रोक्कुजो मेस्सीलाई समर्थन गर्न प्रायः मैदानमा पुगिरहन्छिन् ।

मेस्सी पनि अवार्ड समारोहलगायत महत्वपूर्ण अवसरमा रोक्कुजो र तीन छोरालाई साथै लिएर जाने गर्छन् । मेस्सी र रोक्कुजो बाल्यकालदेखिका साथी हुन् र सन् २००८ यता प्रेम सम्बन्धमा रहेर पछि विवाह गरेका थिए ।

हालै ब्राजिलको एक मिडियाले कुनै समय मेस्सीले रोक्कुजोलाई ढाँटेर अन्य युवतीसँग सम्बन्धमा बसेको उल्लेख गरेपछि यसले चर्चा पाएको छ ।

दिरेतो दो मियोलोका अनुसार सोही सम्बन्धका कारण मेस्सी र रोक्कुजोबीचको वैवाहिक सम्बन्ध नै अप्ठेरोमा परेको थियो । उक्त मिडियाले मेस्सी अर्जेन्टिनी पत्रकार सोफिया मार्टिनेजसँग प्रेम सम्बन्धमा रहेको दाबी गरेको थियो ।

रोक्कुजोकी साथी तथा मेस्सीका कुनै समयका सहकर्मी सेस फेब्रिगासकी श्रीमती ड्यानियला सेमानले ब्राजिलियन मिडियाको उक्त दाबी झूटो र कपोकल्पित भएको जिकिर गरेकी छन् ।

कुनै समय बार्सिलोनामा सँगै खेलेका मेस्सी र फेब्रिगास मिल्ने साथी हुन् । उनीहरु बिदा मनाउन श्रीमती लिएर प्रायः सँगै जाने गरेका छन् ।

मेस्सी हाल श्रीमती र छोराहरुसहित अमेरिकामा बस्दै आएका छन् ।