कांग्रेस लुम्बिनीको प्रदेश सम्मेलनमा इतर समूहका नेताहरू खनिए संस्थापन पक्षसँग

रुपन्देही । नेपाली कांग्रेस लुम्बिनीको शनिवारदेखि बुटवलमा सुरु भएको प्रदेश सम्मेलनमा पार्टी संस्थापन समूहको आलोचना गर्ने नेताहरूको स्वर एकमुख जस्तै भयो । जसरी पार्टीको प्रदेश समितिमा इतर समूहको वर्चस्व रहेको छ शनिवारको उद्घाटन समारोहमा बोल्ने वक्ताहरूको लाइन पनि त्यसै गरी नै मिल्यो ।

कार्यक्रममा प्रमुख अतिथि रहेका सभापति तथा पूर्व प्रधानमन्त्री शेरबहादुर देउवासहित संस्थापन समूहको पक्षमा बोल्ने वक्ताहरू निकै कम थिए । सभापति देउवा र सहमहामन्त्री किशोरसिंह राठोर बाहेक अधिकांश वक्ताहरू इतर समूहबाटै थिए ।

इतर समूहका नेताहरूले संस्थापन समूहको आलोचना गर्दा सहभागीहरूले हुटिङ गरिरहेको दृश्यले सभापति देउवाको मुहार उसै गरी तातेको देखिन्थ्यो ।

भाषण कलामा निपूर्ण अधिकांश इतर समूहका नेताहरूले उठाउन खोजेको आलोचना र छेडछाडको देउवाले एकमुष्ठ छोटो जवाफ दिए– ‘मलाई भाषण गर्न मन पर्दैन, म काम गरेर देखाउने मान्छे हो, हेरम कसो सकिन्छ,धेरै गर्न दिने छाँट त छैन ।’ नेता चन्द्र भण्डारीको त नामै लिएर देउवाले अब भाषण होइन कामै गरेर देखाउन चुनौती दिए ।

देउवा वरिष्ठ नेता डाक्टर शेखर कोइराला, महामन्त्रीद्वय गगन थापा, विश्वप्रकाश शर्मा नबोल्दै प्रमुख अतिथि भए पनि काठमाडौँ जान हतार भएको भन्दै अगाडि बोलेर हिँडेका थिए । उनीभन्दा अगाडि इतर समूहका नेताहरू  चन्द्र भण्डारी, दीपक गिरी, प्रदेश सभापति अमर सिंह पुनलगायतका नेताहरूले पार्टी संस्थापन समूहको आलोचना गरेका थिए । देउवाको डिफेन्समा बोल्ने नेताहरू कम भएको सहभागी प्रतिनिधिहरूले आंकलन पहिलै गरिसकेका थिए  ।

देउवा सम्बोधन गरेर हिँडेपछि बोल्ने कोइराला, शर्मा र थापाले पनि संस्थापन समूहको आलोचना गरेका थिए ।