भक्तपुरका युवा गायक रोशनको ‘सररर हावा चल्यो’को म्युजिक भिडिओ सार्वजनिक

भक्तपुर । भक्तपुरका युवा गायक रोशन धौभडेलको ‘सररर हावा चल्यो’ गीतको म्युजिक भिडिओ सार्वजनिक गरिएको छ ।

नेपाल संगीत तथा नाट्य प्रज्ञा प्रतिष्ठानकी कुलपति निशा शर्माले उक्त म्युजिक भिडिओ सार्वजनिक गरेकी हुन् ।

गीतका सुशील चालिसेको अफिसियल युट्युब च्यानलबाट सार्वजनिक गरिएको म्युजिक भिडिओमा नायिक अनु शाह र नयाँ मोडेल रमेश विश्वकर्माको मुख्य अभिनय रहेको छ । भक्तपुरकै चाँगुनारायण नगरपालिका- ८ सुडालमा खिचिएको म्युजिक भिडिओको निर्देशन माइकल चन्दले गरेका हुन् ।

दुई वर्षअघि तयार भएको गीतमा गायक धौभडेलले नै संगीत भरेका हुन् । यससँगै करिब ३ दर्जन गीतमा स्वर दिइसकेका धौभडेलल थप ६ वटा गीतको तयारी गरिरहेको जानकारी दिए ।

‘वन्ली यू’ भन्ने गीति एल्बम ल्याइसकेका उनले थप ६ वटा गीत समेटिएको अर्को एल्बम ल्याउने तयारी भइरहेको बताए ।

म्युजिक भिडिओ सार्वजनिक गर्दै कुलपति शर्माले नेपालमै गीतसंगीतको प्रमाणपत्र पाउने व्यवस्था मिलाउन प्रतिष्ठान लागिपरेको बताइन् । यसको लागि त्रिभुवन र काठमाडौं विश्वविद्यालयसँग छलफल गरेर कार्यविधि बनिरहेको उनको भनाइ थियो ।

कुलपति शर्माले म्युजिक भिडिओमा गायकगायिकालाई जस्तै गीतकारलाई पनि प्रस्तुत गर्नुपर्ने बताइन् ।

वरिष्ठ गीतकार सुवासचन्द्र ढुंगेलले म्युजिक भिडिओमा लगानी गर्न नसक्ने राम्रा गीतकार तथा गायकहरु ओझेलमा पर्ने गरेको बताए । म्युजिक भिडिओले गर्दा गीतकार र गायकभन्दा कलाकारलाई बढी चिन्ने अवस्था आएको उनको भनाइ थियो ।

त्यस्तै वरिष्ठ साहित्यकार ध्रुव मधिकर्मीले राम्रो भिडिओले गीतसंगीतलाई थप प्रभावकारी बनाउने बताए ।