देव गुरुङको दाबी- प्रचण्ड सरकार तीन वर्ष, गठबन्धन पाँचै वर्ष

काठमाडौं । नेकपा (माओवादी केन्द्र) का महासचिव देव गुरुङले जनताले माओवादी घटक एक भएको हेर्न चाहेको बताएका छन् । रुकुमपश्चिममा प्रेस सेन्टरले गरेको पत्रकार सम्मेलनमा उनले पूर्वमाओवादी घटकको एकताको कुरा भइरहेको बताए ।

उनले भने, ‘सामाजवादी मोर्चामा पनि त्यो कुरा भएको छ । नेपाल समाजवादी पार्टीसँग एकता गर्न त कार्यदल नै निर्माण भएको छ । माओवादी केन्द्रको नेतृत्वमा नै पार्टी एकता हुन्छ । कम्युनिष्ट विचारधारा बोकेका राजनीतिक दलको एकता आजको आवश्यकता छ ।’

कम्युनिष्टमा वैचारिक कुरामा केही नमिले जस्तो देखिए पनि मिलाउन सकिने उनको बुझाइ छ । कम्युनिष्टमा अन्तरद्वन्द्व हुनु उपयुक्त नभएको बताउँदै उनले कुनै समयमा ठाउँमा आउनुको विकल्प नभएको जिकिर गरे ।

उनले प्रचण्ड नेतृत्वको सरकार तीन वर्ष टिक्ने दाबी गरे ।

उनले भने, ‘यो सरकार ढाल्नलाई धेरै प्रयास भइरहेका छन् । अहिलेको सरकार तीन वर्ष नै टिक्छ । सरकार ढाल्ने षड्यन्त्र कसैको सफल हुन सक्दैन ।’

प्रचण्ड नेतृत्वको सरकारले गरेको कामलाई जनताले रुचाएको उनको जिकिर छ ।