यू-१९ टीमलाई बिदाइ गर्दै खेलकुदमन्त्रीको टीप्स- छक्का मात्रै हान्न नखोज्नुस्, मैले पनि क्रिकेट खेल्या छु (भिडिओ)

काठमाडौं । यू १९ एसिया कप खेल्न यूएई जाने टीमलाई आज औपचारिक बिदाइ गरिएको छ । बिदाइ कार्यक्रममा खेलकुदमन्त्री दिगबहादुर लिम्बु तथा नेपाल क्रिकेट संघ (क्यान) का पदाधिकारीहरुको उपस्थिति थियो ।

कार्यक्रममा क्यानका सचिव पारस खड्काले यो प्रतियोगिता यू १९ विश्वकपका लागि महत्वपूर्ण हुने बताए । नेपाली अन्डर १९ टीमले धेरै ऐतिहासिक उपलब्धिहरु हासिल गरेको उल्लेख गर्दै उनले आफूलाई प्रुफ गर्ने अवसरका रुपमा लिन खेलाडीहरुलाई सल्लाह दिए ।

खड्काले भने, ‘अन्डर १९ भनेको सिनियर टीमको बेन्च स्ट्रेन्थ पनि हो । तपाईंहरुले यसलाई आफूलाई प्रुफ गर्ने र रेकर्ड बनाउने अवसरका रुपमा लिन सक्नुहुन्छ ।’ नेपाली टीमका कप्तान देव खनालले टीमको तयारी राम्रो रहेको बताए । सिनियर टीमले कायम गरेको उच्च प्रदर्शनलाई युवा टीमले पनि अघि बढाउने उनको भनाइ थियो ।

खनालले भने, ‘तयारी राम्रो भएको छ । सिनियर टीमसँग पनि हामीले ४/५ म्याच खेल्यौं । अब टेस्ट प्लेइङ राष्ट्रसँग खेल्दैछौं । सिनियर दाईहरुको मोमेन्टम क्यारी गर्ने लक्ष्य लिएका छौं ।’

कार्यक्रममा नेपाली यू १९ टीममा प्रशिक्षक जगत टमाटाले आफ्नो टीमका खेलाडीहरुले सरकारद्वारा घोषित पुरस्कार नपाएको गुनासो गरेका थिए । यस सम्वन्धमा उनले मन्त्रीसमक्ष जवाफ मागे ।

खेलकुदमन्त्री दिगबहादुर लिम्बुले खेलाडीहरुले एक दुई दिनमा नै घोषित पुरस्कार पाउने आश्वासन दिए । विगतमा पुरस्कार वितरण सम्बन्धमा रहेका जटिलतालाई सरकारले फुकाइसकेको भन्दै उनल अब समस्या नआउने प्रतिवद्धता समेत जनाए ।

मन्त्री लिम्बुले खेलाडीहरुलाई टीप्स दिन पनि भ्याए । उनले चौका–छक्का हान्नेभन्दा पनि सम्हालिएर खेल्न सुझाव दिए ।

मन्त्री लिम्बुको सम्बोधन यस्तो थियोः

पुरस्कारको कुराले पहिले त निकै सकस बनाएको थियो । अहिले त्यस्तो अवस्था छैन । मन्त्रालयमा सानो काम बाँकी छ । पैसा आइसकेको छ । अर्थले स्वीकृति दिइसकेको छ । विगतमा अलिकति जटिलता थियो । त्यो सबै गाँठो फुकाएर अब सजिलो बनाइएको छ । हामीले कमिटमेन्ट गरेका छौं कि खेल जितेर आएको ७ देखि १५ दिनभित्र पुरस्कार रकम निकासा गसिक्नुपर्छ ।

अब दुई दिनभित्र खातामा पुग्छ । आज कार्यक्रममा राखेर पुरस्कार पनि बितरण गरौं भन्न खोज्या थियौं । खाली हातजस्तो भयो । तर, २ दिनमा पुग्छ । यसमा ढुक्क हुन आग्रह गर्छुृ ।

मैले (नेपालको खेल) हेर्या छु । इन्डियामा त अहिले नेपालकै प्रचार हुन्छ । इन्डियन च्यानलले नेपालकै प्रचार गरेका छन् । नेपालको समूहमा पाकिस्तान र भारत छन् होइन ? नेपालले सँधै डाइरेक्ट पाकिस्तान र भारतसँग फेस गर्नुपर्ने अवस्था छ । 

यो पार पाइसकेपछि मलाई लाग्छ, पहिलो फेजमा यो टीमहरु फेस गरिरहनु पर्दैन । अर्को टिमसँग जान्छजस्तो लाग्छ मलाई । यसका लागि तपाईंहरु सक्षम हुनुहुन्छ । यो पार लगाउनुस । फर्केर आएपछि पुरस्कार राशी हस्तान्तरण गर्छौं । मन सानो नगरी अगाडि बढ्नुस ।

म एउटा कुरा के भन्न चाहन्छु भने, छक्का हान्ने सुरमा सबै कुरा नगुमाउनुस । सबै नेपाली जनताले तपाईंहरुलाई हेरिरहेको छ । राष्ट्रिय गौरब बोकेर जाँदै हुनुहुन्छ । उत्साहीत भएर खेल्नुस तर पनि के भन्छु भने छक्का प्राप्त गर्ने नाममा, छक्कै–छक्का हान्ने सुरमा सबै कुरा नगुमाउनुस । गेमलाई कन्ट्रोल गर्न, बसमा लिन पनि केही ‘ब्याक’ हट्र्नुपर्छ ।

यसो हेर्छु कहिलेकाहीँ । छक्का चौका हान्ने सुरमा चुकेको हो कि जस्तो हो कि जस्तो लाग्छ मलाई । म क्रिकेट खेलाडी होइन । सुरुमा त सिक्या हो । ब्याटसँग बल जुधेर अम्ला फुटेपछि छोडिदिएँ । हामीले खेलेको समय अर्कै खालको थियो । अहिलेजस्तो स्पोन्सर गर्ने थिएनन् । खल्तिबाटै पैसा निकाल्नुपथ्र्यो । जमाना निकै फरक छ । अब १० वर्षपछि झनै फेसिलिटी पाउँछन् ।