यू १९ एसिया कपः पाकिस्तानविरुद्ध नेपालको ब्याटिङ धराशयी, गुल्शन १ रनमा आउट

काठमाडौं । यूएईमा सुरु भएको यू १९ एसिया कप अन्तरगत पाकिस्ताविरुद्धको पहिलो म्याचमा नेपालको ब्याटिङ संकटमा परेको छ । १६ ओभरको खेल सकिँदा नेपालले ४३ रन मात्रै जोड्न सकेको छ भने प्रमुख पाँचजना ब्याट्सम्यान पेभिलियन फर्किएका छन् ।

पाकिस्तानले टस जितेर नेपाललाई पहिलो ब्याटिङको निम्तो दिएको थियो । नेपालले पहिलो विकेट सस्तैमा गुमायो । ओपनरका रुपमा आएका तिलक भण्डारी ९ बलमा ७ रन बनाएर आउट भए । उनलाई अमिर हसनले विकेटकिपरको हातबाट क्याच गराए ।

तेस्रो नम्बरमा आएका आकाश त्रिपाठीले पनि २२ बलको सामना गर्दै ६ रन मात्रै जोड्न सके । उबैद साहले उनलाई एलबीडब्लुको धरापमा पारे । त्यसपछि चौंथो नम्बरमा क्रिजमा आएका देव खनाल पनि आउट भएपछि नेपाल संकटमा परेको छ ।

दुई विकेट चाँडै गिरेपछि नेपालको आशा ओपनर अर्जुन कुमाल र देव खनालमाथि थियो । तर, खनालले १३ बलको सामना गर्दा एक रन पनि जोड्न सकेनन् । उनी मोहम्मद जिसनको बलमा क्याच आउट हुन पुगे ।

ओपनर अर्जुन कुमालले नेपालको एउटा इन्ड सम्हालिरहेका थिए । १६ औं ओभरको अन्तिम बलमा पाकिस्तानले अर्जुनलाई पेभिलियन फर्काइदिएको छ । मोहम्मद जिसानले अर्जुनलाई आउट गर्दै व्यक्तिगत दोस्रो विकेट लिए । आउट हुनुअघि अर्जुनले ३७ बलमा ३ चौकासहित २१ रन बनाए ।

नेपालले सबैभन्दा बढी आशा राखेका गुल्शन झाले पनि कुनै चमत्कार गर्न सकेनन् । छैटौं नम्बरमा ब्याटिङमा आएका गुल्शनले एक रन मात्रै जोड्न सके । उनको विकेटसँगै नेपाललाई १०० रन कटाउन पनि हम्मे पर्ने अवस्था देखिएको छ ।