धनगढीमा जारी एलपीएलमा अत्तरिया क्लबले गर्‍यो २५ हजारसम्मको पुरस्कार घोषणा

कैलाली । कैलालीको धनगढीमा आयोजना भइरहेको लिटल फ्लावर लिग (एलपिएल) को आठौं संस्करणमा कैलालीको पीएफए स्पोर्ट्स क्लवले विभिन्न घोषणा गरेको छ ।

गोदावरी नगरपालिका खेलाडीहरूको प्रोत्साहनको लागि क्लवले २५ हजारसम्मको पुरस्कार घोषणा गरेको हो । गोदावरी नगरपालिकाका खेलाडी जुनसुकै टीमबाट खेल्दा पनि उनीहरूलाई प्रोत्साहन गर्न रकम घोषणा गरिएको जनाइएको छ ।

क्लवले एकै ओभरमा पाँच छक्का प्रहार गर्ने खेलाडीलाई २५ हजार, प्रत्येक छक्कामा एक हजार पाँच सय, प्रत्येक चौकामा एक हजार दिने घोषणा गरेको छ । त्यस्तै प्रत्येक विकेटमा २ हजार, अर्ध शतक प्रहार गर्ने खेलाडीको लागि ५ हजार, शतक प्रहार गर्ने खेलाडीलाई १० हजार, ह्याट्रिक लागि २५ हजार ओभर ह्याट्रिक लागि १० हजार प्रत्येक क्याचको लागि एक हजार पाँच सय र एक ओभरमा पाँच चौका प्रहार गर्ने खेलाडीलाई १५ हजार दिने घोषणा गरिएको छ ।

क्लवले घोषणा गरेको पुरस्कार राशीले खेलाडीको उत्साह थपिने अपेक्षा गरिएको आयोजक लिटिल फ्लावर स्पोर्ट्स क्लब अध्यक्ष रामचन्द्र शाहीले बताए ।

क्लबको आयोजनामा सुरू भएको प्रतियोगिताको यो आठौं संस्करण हो । उपाधि विजेताले दुई लाख ५५ हजार र उपविजेताले एक लाख २८ हजार रूपैयाँ पुरस्कार पाउने छन् । प्रतियोगितामा काठमाडौं, रौतहट, दाङ, कैलाली र कञ्चनपुरका गरी १६ वटा टिमको सहभागिता छ ।