माओवादीले बोलायो पदाधिकारी बैठक

काठमाडौं । नेकपा माओवादी केन्द्रले पदाधिकारी बैठक बोलाएको छ । पुस ३ गते बिहान ८ बजे पार्टी मुख्यालय पेरिसडाँडामा बस्नेगरी बैठक बोलाइएको कोषाध्यक्ष तथा कार्यालय मुख्यसचिव श्रीराम ढकालले बताए ।

उनले बैठकमा सरकारको समिक्षा, पार्टी रुपान्तरण अभियानको अहिलेसम्मको प्रगति, राष्ट्रियसभा निर्वाचनलगायतको विषयमा छलफल हुने उनले बताए ।

उनले भने, ‘हामीले पार्टीको यो अभियानको समीक्षा गरेपछि विधान सम्मेलन गर्दैछौं । त्यसबारे पनि यो बैठकमा छलफल हुन्छ।’

त्यसो त डा. बाबुराम भट्टराई नेतृत्वको नेपाल समाजवादी पार्टीसँग एकता गर्नको लागि एकता संयोजन समिति गठनबारे पनि छलफल हुने जनाइएको छ । माओवादीले भदौ १६ देखि थालेको रूपान्तरण अभियान पनि पुस १६ गते सकिँदैछ।

यता, प्रधानमन्त्री प्रचण्डको राजनीतिक सल्लाहकारबाट राजीनामा दिएका उपमहासचिव हरिबोल गजुरेलले यही बैठकमा आफ्नो कुरा राख्ने तयारी गरेका छन् ।

उनले प्रधानमन्त्रीलाई मंसिर २० गते नै राजीनामा बुझाएका थिए । तर, उनले आफूले नीतिगत विषय उठाउँदै राजीनामा दिएको बताएपछि अहिलेसम्म ठोस कारण खुलाएका छैनन् ।