मुम्बईले किन खोज्यो रोहितको विकल्प, पान्ड्या कसरी छानिए उत्तराधिकारी ?

काठमाडौं । सन् २०२२ को आईपीएल अक्सनअघि मुम्बई इन्डियन्सले अलराउन्डर हार्दिक पान्ड्यालाई रिलिज गर्‍यो । मुम्बईको उक्त निर्णयले पान्ड्या कुनै पनि टोलीमा भित्रने बाटो खुल्यो । पहिलो पटक आईपीएल खेल्न लागेको गुजरात टाइटन्सले उनीमाथि नजर लगायो ।

त्यतिमात्र होइन, कप्तानको जिम्मेवारी नै दियो । पहिलो सिजन नै गुजरात आईपीएलको विजेता बन्यो । कप्तानी गरेको पहिलो सिजन नै टोलीलाई प्रतियोगिताको उपाधि दिलाउने पान्ड्या आईपीएलमा सेन वाट्सनयता पहिलो कप्तान बने । त्यस सिजन मुम्बई प्रतियोगितामा सहभागी १० टोलीमध्ये १०औं तथा अन्तिम स्थानमा रहेको थियो ।

गत सिजन पनि गुजरातलाई फाइनलसम्म पुर्‍याएका पान्ड्या पुनः मुम्बई इन्डियन्स फर्किएका छन् । त्यतिमात्र होइन, मुम्बईले आगामी सिजनको लागि पान्ड्यालाई कप्तानको जिम्मेवारी दिएको छ । यसको मतलब आईपीएलका सर्वाधिक सफल कप्तान रोहित शर्मा मुम्बईको कप्तानबाट हटेका (हटाइएका पनि भन्न सकिन्छ) छन् । हाल भारतीय राष्ट्रिय टोलीको कप्तानसमेत रहेका शर्माविरुद्ध भएको यो निर्णयलाई अर्थपूर्ण रुपमा हेरिएको छ ।

पान्ड्या हाल सबै फर्म्याटमा भारतीय टोलीमा उपकप्तान रहेका छन् । गत एक दिवसीय विश्वकपमा भारत फाइनलसम्म पुग्दा पनि रोहित कप्तान र पान्ड्या उपकप्तान थिए ।

घरेलु मैदानमा भारतलाई उपाधि जिताउन नसकेपछि ३६ वर्षीय रोहित निराश छन् । सन् २००८ मा पहिलो पटक आईपीएल खेलेका रोहितले सन् २०१३, २०१५, २०१७, २०१९ र २०२० मा मुम्बई इन्डियन्सलाई आईपीएल उपाधि दिलाएका थिए । ती सबै संस्करणमा रोहित मुम्बईका कप्तान थिए । गुजरातबाट प्राप्त उपलब्धिकै कारण पान्ड्या भारतीय टोलीको नेतृत्वका लागि पनि दावेदार देखिएका छन् ।

आईपीएलमा चेन्नई सुपर किङ्स र मुम्बई इन्डियन्सले सर्वाधिक ५-५ पटक उपाधि जितेका छन् । चेन्नईले जितेका सबै अवसरमा महेन्द्रसिंह धोनी कप्तान रहेका थिए । यसको मतलब धोनी र रोहित आईपीएलका सर्वाधिक सफल कप्तान हुन् । तर, टी-२० फर्म्याटमा पछिल्लो समय रोहितको प्रदर्शन स्तरीय देखिँदैन ।

सोही कारण यसअघि कप्तानीको जिम्मेवारी दिने शर्तमा मुम्बईले पान्ड्यालाई भित्र्याएको हुनसक्ने अन्तर्राष्ट्रिय सञ्चारमाध्यमहरुले उल्लेख गरेका छन् । गत वर्ष आयोजित टी-२० विश्वकपमा रोहितले उल्लेखनीय प्रदर्शन गर्न सकेका थिएनन् । त्यहाँ उनले ६ खेल खेल्दै केवल ११६ रन बनाएका थिए । प्रतियोगितामा एउटा अर्धशतकमात्र रोहितको नाममा रहेको थियो । त्यसै वर्ष उनले आईपीएलमा खेलेका १४ खेलमा एउटा पनि अर्धशतक बनाउन सकेका थिएनन् । उनले १४ खेलमा २६८ रन जोडेका थिए ।

पछिल्लो समयमा रोहितको अनुपस्थितिमा पान्ड्याले भारतीय टोलीको कप्तानी गरिरहेका छन् । भारतले खेलेका पछिल्ला २५ टी-२० खेलमध्ये १३ वटामा पान्ड्याले कप्तानी गरेका छन् । उनलाई भारतीय टोलीमा टी-२० र एक दिवसीय फर्म्याटका लागि रोहितको उत्तराधिकारीका रुपमा हेर्न थालिएको छ । राष्ट्रिय टोलीको कप्तान बन्न सक्ने खेलाडी भएकाले पनि मुम्बईले पान्ड्यालाई उक्त जिम्मेवारी दिएको हुनसक्ने हिन्दूस्तान टाइम्सले उल्लेख गरेको छ । रोहितसामु आसन्न टी-२० विश्वकपमा ठाउँ बनाउनसमेत चुनौती रहेको भारतीय सञ्चारमाध्यमले उल्लेख गरेका छन् ।

उनले यसै वर्ष आयोजना भएको आईपीएलमा १६ खेल खेल्दै ३३२ रन जोडेका थिए । मुम्बई प्लेअफसम्म पुगेको थियो । रोहितले कप्तानी गरेका १५८ खेलमा मुम्बईले ८७ वटा जितेको छ भने ६७ वटा हारेको छ । यतिबेला टी-२० विश्वकपअघि रोहितलाई आईपीएलमार्फत आफ्नो लय देखाउनु चुनौतीपूर्ण देखिएको छ । नत्र पान्ड्याले राष्ट्रिय टोलीमा समेत उनलाई विस्थापित गर्न सक्नेछन् ।

रोहित आईपीएल इतिहासमा चौथो सर्वाधिक रन बनाउने ब्याट्सम्यान हुन् । उनले २४३ खेलमा एक शतक र ४२ अर्धशतकसहित ६ हजार २११ रन जोडेका छन् । शीर्षस्थानमा रहेका विराट कोहलीको नाममा २३७ खेलमा ७ हजार २६३ रन रहेको छ । सन् २०१५ मा आईपीएलमा डेब्यु गरेका पान्ड्याले हालसम्म १२३ खेल खेल्दै १० अर्धशतकसहित २ हजार ३०९ रन जोडेका छन् भने ५३ विकेट हात पारेका छन् ।