हिन्दी फिल्म ‘जग्गा जासुस’का सहनिर्देशक प्रधानको सिरिज ‘खेल’को शुभमुर्हूत, मुख्य भूमिकामा सुरक्षा पन्त

काठमाडौं । नेपाली सिरिज ‘खेल’को शुभमुर्हूत गरिएको छ । काठमाडौंको कमलादीस्थित गणेश मन्दिरमा सोमबार बिहान सिरिजका निर्देशक, कलाकार तथा प्राविधिकहरूको उपस्थितिमा क्यामेरा र स्क्रिप्ट पूजा गरिएको हो ।

बलिउडका दर्जन बढी चलचित्रमा सहनिर्देशन गरेका अनुराग प्रधानले निर्देशन गर्ने यस सिरिजमा अभिनेत्री सुरक्षा पन्तले प्रमुख अभिनय गर्दैछिन् । पन्तसँगै भोला सापकोटा, सरिता गिरी, मोनिका थापा, समापिका गौतम, हेना नगरकोटी, यमप्रसाद ओलीलगायतको अभिनय रहनेछ ।

सिरिज काठमाडौंभित्र करिब एक महिना छायाङ्कन हुनेछ । निर्देशक प्रधानले १०० वर्ष अगाडिको काठमाडौंको सेटअपमा पूरै सिरिज छायाङ्कन हुने बताए ।

ओटीटी प्लेटफर्म ‘नेटफ्लिक्स’को प्राविधिक मूल्याङ्कनमा आधारित रही बन्ने यो सिरिजको पहिलो सिजन पाँच शृङ्खलाको हुने प्रधानले बताए । नेटफ्लिक्समा स्ट्रिमिङ भइरहेका केही बलिउड चलचित्रमा काम गरेका उनले नेपाली कन्टेन्टको लागि नेटफ्लिक्सले अग्रिम लगानी नगरी पछि मूल्याङ्कन गरी रिलिजबारे निर्णय लिने बताएपछि आफूले सोहीअनुरूप सिरिजमा काम गरिरहेको बताए ।

पौराणिक र अध्यात्ममा आधारित यो सिरिजमा चार जना साथीको कथा रहनेछ । एक दशकअगाडि बलिउडको चर्चित चलचित्र ‘बर्फी’मा इन्टर्न गरी चलचित्र यात्रा सुरु गरेका दार्जिलिङ निवासी निर्देशक प्रधानले बलिउडका चर्चित चलचित्रहरू ‘जग्गा जासुस’, ‘बादशाहो’, ‘हिटः द फर्स्ट केस’, ‘धक धक’लगायतका चलचित्र तथा सिरिजमा सहनिर्देशन गरेका छन् ।

सिरिज अभिनेत्री सुरक्षा पन्तले आफू पहिलेदेखि नै ओटीटीको वकालत गर्दै आएको बताइन् । उनले अब बन्ने चलचित्र तथा सिरिजहरू हलमा मात्र सीमित हुन नहुने बताउँदै नेटफ्लिक्सको गुणस्तर र लक्ष्यमा बनिरहेको सिरिजमा काम गर्न पाउँदा खुसी रहेको जनाइन् ।

सिरिजमा आफ्नो भूमिकाबारे बताउँदै उनले भनिन्, ‘अध्ययनको लागि काठमाडौंको होस्टेलमा बस्ने साथीहरूले अध्यात्ममा आधारित खेल खेल्दै गर्दा वास्तविक जीवनमा हानि पुगेपछि त्यसबाट उम्किनलाई पुनः खेल्ने खेल कथा हो । चार जना केटी साथीको टीमको प्रमुखको रूपमा मैले काम गर्दैछु । कुनै पनि खेललाई निष्ठापूर्वक नखेल्दा हाम्रो जीवनमा कस्तो हानि हुन्छ भन्ने दर्साउन खोजिएको छ ।’

सिरुपाते कट्स प्रालिले निर्माण गर्ने यस सिरिजका निर्माताहरू आशिषराज महर्जन र लुइशराज महर्जन हुन् । सहनिर्माता कुनाल गुरुङ हुन् । निर्माता आशिषको कथामा निर्देशक प्रधानले पटकथा लेखेका छन् ।

यसका सिनेमाटोग्राफर रोशन राई हुन् । राईले पनि बलिउडका केही चलचित्रमा सिनेमाटोग्राफी टीममा रहेर काम गरेका छन् । सिरिजमा एलेक्स बासुकलाको कस्ट्युम डिजाइन, किशोर नेपालको कला निर्देशन, आस्था श्रेष्ठको सहनिर्देशन रहनेछ । यमप्रसाद ओली प्रोडक्सन विभाग प्रमुख हुन् ।