कसरी सुरू भयो बक्सिङ डे, के खेलसँग सम्बन्धित छ ?

काठमाडौं। क्रिसमस धर्मालम्बीहरु क्रिसमस डेको भोलीपल्ट अर्थात डिसेम्बर २६ लाई बक्सिङ डेका रुपमा मनाउँछन्। युरोप र अमेरिकामा यही दिन हुने खेलहरुले पनि ‘बक्सिङ डे गेम’का रुपमा विशेष चर्चा पाउँछन्।

तर बक्सिङ डे खेलसँग सम्बन्धित भएर मनाउन सुरु गरिएको भने होइन। महारानी भिक्टोरियाको शासनताका बक्सिङ डे सुरु भएको मानिन्छ। बेलायती सन्चार माध्यम बिबिसीका अनुसार नोकरहरुलाई उनिहरुका मास्टरहरुले बक्समा उपहार राखेर दिने र विदा पनि दिने कारण बक्सिङ डे सुरु भएको हो।

मास्टरहरुबाट प्राप्त त्यस्ता क्रिसमस बक्सहरु नोकरले लगेर परिवारलाई दिने गर्थे। त्यसबाहेक चर्चहरुमा पनि वर्षभर जम्मा भएको रकम बक्समा जम्मा गरेर क्रिसमस डेको दिन खोलिने र भोलिपल्ट गरिबलाई वितरण गर्ने गरिन्थ्यो। यस्तो अभ्यास अहिले छैन।

बक्सिङ डेका दिन बेलायतमा सार्वजनिक बिदा दिइन्छ र त्यो दिन शनिबार परे सोमबार र आइतबार परे मंगलबार सार्वजनिक बिदा दिइने गरेको बिबिसीले जनाएको छ।

डिसेम्बर २६ तारिखको धार्मिक महत्व पनि छ। आयरल्यान्ड र स्पेनको क्यातालोनियामा सेन्ट स्टेफन डेका रुपमा यो दिनलाई मनाइन्छ। यस्तै हंगेरी, जर्मनी, पोल्यान्ड र नेदरल्यान्ड्सलगायत देशमा सेकेन्ड क्रिसमस डे भन्ने गरिन्छ।