कुमारको ‘सिउॅंडीको काडैमा’ बिना र निक्सको रोमान्स

काठमाडौं । गीतकार कुमार शिवाकोटीको ‘सिउॅंडीको काडैमा’ बोलको गीतको भिडिओ रिलिज गरिएको छ । रमेश कँडेलको स्वर रहेको यो गीतमा कल्याण सिंहको संगीत र मोहीत मुनालको एरेन्ज रहेको छ ।

डान्सिङ शैलीको सिउॅंडीको काँडैमा मोडल बिना राउतसँग निक्स शर्मा गज्जबसँग खुलेका छन् । एक रोमान्टिक प्रेम कहानी र आफ्नी मायालुको खुलेर प्रशंसा गरिएको म्युजिक भिडिओमा प्रहील कार्कीले निर्देशन गरेका छन् ।

भिडिओको निर्माताका रूपमा यशना लुईंटेल, प्रिन्सा शर्मा र प्रनिका शिवाकोटी छन् । यसअघि प्रेम र विरहका गीत बजारमा ल्याएका गीतकार कुमार शिवाकोटीले फरक शैलीको छमछम नचाउने गीतको भिडिओबाट निकै आशा राखेको बताए ।

अमेरिकामा रहेका गीतकार शिवाकोटीले यसअघि ‘भिझाएर आँशु’, ‘पिरतीको खेल’, ‘प्रियसी’ बजारमा ल्याइसकेका छन् । ‘हामी नेपाली’ बोलको गीत रिलिजको क्रममा छ । गीत लेखनमा लामो समयदेखि सक्रिय शिवाकोटीले अहिलेसम्म २ दर्जन बढी गीत आफ्नै शब्दमा रेकर्ड गराइसकेका छन् । सार्वजनिक गीतको भिडिओ जन्मभूमि इन्टरटेनमेन्ट मार्फत् बजारमा आएको हो ।