भोजपुर प्रतिभा सम्मान ‘हिरण्य भोजपुरे’ र पुरस्कार ‘करुणा राई’लाई दिइने

काठमाडौं । भोजपुर प्रतिभा प्रतिष्ठान बेलायतले हरेक दुई-दुई वर्षमा प्रदान गर्दै आएको प्रतिभा सम्मान र प्रतिभा पुरस्कार यस वर्ष क्रमशः संगीतकार, गायक तथा लेखक हिरण्य भोजपुरे र कवयित्री करुणा राईलाई प्रदान गर्ने भएको छ ।

प्रतिष्ठानको निर्णयअनुसार सम्मान राशि १५ हजार रुपैयाँ र प्रतिभा पुरस्कार राशि ३५ हजार रुपैयाँ र ताम्रपत्र रहेको छ ।

संस्थाले यसअघि साहित्यकारहरु पूर्णप्रकाश यात्री, परशु प्रधान, कृष्ण जोशी, जीबी लुगुन, सैलेन्द्र साकार, मन्जुल र साहित्यकार एवं गायक तथा संगीतकार गणेश रसिक, इतिहासकार ज्ञानमणि नेपाल र श्याम तमोटलाई सम्मान गरिसकेको छ ।

यसैगरी पुरस्कृत हुने स्रष्टाहरुमा कवि श्रवण मुकारुङ, संगीतकार दिनेश वान्तवा, कवि विप्लव ढकाल, कवि विमल गीरी, धाविका मीरा राई, कवि तथा समालोचक पूर्ण ईन्फादा, गायक भीषण मुकारुङ र लेखक कविता राई रहेका छन् ।

यस वर्षको सम्मान र पुरस्कार २०८१ साल बैशाखमा एक कार्यक्रमबीच प्रदान गरिने संस्थाले जनाएको छ ।