धर्मेन्द्र विह्वलको कविता सङ्ग्रह ‘शहरक भीड़मे एसगर हम’ प्रकाशित

काठमाडौं । साहित्यकार धर्मेन्द्र विह्वल अर्थात पत्रकार धर्मेन्द्र झाकाे पछिल्लो पटक मैथिली भाषामा कविता सङ्ग्रह ‘शहरक भीडमे एसगर हम’प्रकाशित भएको छ ।

उनको यो छैठौँ कविता सङ्ग्रह हो । मैथिली साहित्यमा प्रयोगधर्मी कविका रूपमा स्थापित विह्वलको यो कृति पनि एक प्रयोग नै हो । उनले यो कृतिमा एकै शीर्षक शहरमा ५१ वटा कविता अटाएर विशेष कृतिको रुपमा प्रकाशित गरेका छन् ।

यस संग्रहबाट मैथिली कविताका पाठकहरूले कवि धर्मेन्द्रको विस्तारित कविताको आनन्द लिन सक्नेछन् । आफ्नो समयको काव्यात्मक प्रतिमान स्थापित गर्न उन्मुख कवि धर्मेन्द्रको यो कविता संग्रहलाई विवेकशील पाठक, समीक्षक र साहित्यकार दार्शनिकहरूले पक्कै मन पराउने छन् ।

उनका कविताहरूमा व्यक्तिगत अनुभवहरूको जरा गाडिएको हुन्छ र यस कृतिमा समेत त्यो बुझाइको अनुभव गर्न सकिन्छ । विह्वलका अनुसार साहित्य भनेको कल्पना मात्र होइन, यसले वास्तविकताका तत्वहरू समाहित गर्दछ र उनको काव्यात्मक अभिव्यक्तिमा त्यो भाव प्रष्ट प्रतिबिम्बित हुन्छ ।

छिट्टै मैथिली भाषामै अर्को कृति प्रकाशनको तयारीमा रहेको विह्वल आजिवन सञ्चार जगत र साहित्य लेखनबाट आफू बिट मार्ने सोचमा नरहेको बताउँछन् ।

उनी भन्छन्,यो कर्म मेरो दैनिकी र जीवनको अभिन्न अंग सरह नै बनिसकेको छ ।’

मिथिला नट्यकला परिषद्ले प्रकाशन गरेको यस कृति ‘शहरक भीड़मे एसगर हम’ मा आवरणसहित सबै चित्रहरू मिथिला चित्रकलाका धरहरा प्रसिद्ध कलाकार एस सी सुमनले बनाएका छन् । वास्तवमा सुमनको चित्रले कवितालाइ पूर्णता प्रदान गरेको छ । विह्वल्को शब्द र सुमनको चित्रको ‘फ्युजन’ ले सङ्ग्रहलाइ विशेष बनाएको छ ।

यस अघि विव्हलका‘रस्ता तकैत जिनगी (२०५१)’ , ‘एक सृष्टि एक कविता (२०५६०)। एक समयक बात (२०६३), ‘धुवाँएल आकृतिसभ (२०६३) र ‘व्योमक ओहि पार (२०७८) मैथिली कविता सङ्ग्रह प्रकाशित छन ।