प्रकाश सपुतको ‘रुवावासी सेन्टर’ चर्चामा, कस्तो छ नयाँ गीत ?

काठमाडौं । गायक प्रकाश सपुतका गीतहरु सँधै दर्शक/स्रोताका लागि प्रतिक्षित हुन्छन् । हरेक गीतमा नयाँ शैली र भिडियोमा सिर्जनशीलता उनको विशेषता हो ।
सपुतको नयाँ गीत ‘मुटु कटक्कै’ को भिडिओ हिजो युट्युबमा रिलिज भएको छ । तत्कालै दर्शकहरु यसमा झुम्मिएका छन् । २१ घन्टासम्ममा ५ लाख २५ हजारपटक हेरिएको युट्युबको भिडियो शीर्ष ट्रेन्डिङतर्फ लम्किएको छ ।

यो गीतको गायनमा सपुतलाई थप दुई गायक प्रताप दास र कुशल बेल्बासेले साथ दिएका छन् । सपुतको अघिल्लो गीत ‘दमाइ महाराज’ जस्तै भजन शैलीमा गाइएको हुँदा नयाँपनको महसुस हुँदैन । तर, भिडिओको अवधारणा विल्कुलै नौलो छ । ‘केटा मान्छेहरुलाई रुन एउटा ठाउँ चाहिन्छ’ भन्ने रोचक विषयवस्तु उनले अघि सारेका छन् ।

केटाहरु रुनका लागि शहरमा खुलेको छ, रुवावासी केन्द्र । रुनलाई प्रेममा धोका खाएका युवाहरु त्यहाँ गएर रुन लाइन लाग्छन् । निश्चित शुल्क तिरेपछि उनीहरुलाई एउटा गाउन र आँशु पुछ्न रुमाल दिइन्छ । अनि एउटा कोठामा रुन्चे गीत सुन्दै केटाहरु छाति पिटिपिटि रुन्छन् ।

हरेक कुराहरु व्यवसायीकरण भइरहेको जमानामा सपुतले ‘रुवावासी केन्द्र’ को अवधारणा वास्तवमा अविश्वसनीय पनि लाग्दैन । यो भिडियोबाट काटिएको ‘रुवावासी केन्द्र’को होडिङ बोर्ड सामाजिक सञ्जालमा भाइरल भइरहेको छ । भिडियो नहेर्नेले साँच्चिकै हो कि भन्ने पनि ठानेका छन् ।

गीतको शब्द र संगीत प्रकाश सपुतकै हुन् । भिडियोमा उनले कुशुम शर्मा उर्फ सकम्बरीलाई आफ्नो अनस्क्रिन जोडी बनाएका छन् । सपुतको गीत ‘फुलमाया’ बाट हिट भएकी कुशमले यो भिडियोमा भने त्यति धेरै स्पेस पाएकी छैनन् । यद्यपि, उनको ग्ल्यामर लुकले दर्शकलाई रिझाउने छ ।