सामाजिक कथामा ‘लुसु’ निर्माण हुँदै, शेखर लामाले निर्माण गर्ने

काठमाडौँ। ‘द पाल्म ग्रुप’ प्रालिको ब्यानरमा निर्माण हुन लागेको चौंथो चलचित्र ‘लुसु’ को औपचारिक निर्माण घोषणा गरिएको छ। शेखर लामाको निर्माणमा बन्ने चलचित्र ‘लुसु’ सामाजिक कथामा बन्नेछ। चलचित्रको निर्देशन नवराज श्रेष्ठले गर्ने भएका छन्।

सन् १९९४ को चलचित्र ‘बादल’बाट अभिनय यात्रा सुरु गरेका श्रेष्ठले ‘जन्मभूमि’, ‘गुड लक’, ‘स्काउट’ लगायतका चलचित्रमा अभिनय गरिसकेका छन् । यो उनको निर्देशकीय पहिलो चलचित्र हुनेछ। चलचिको कथा पदम विश्वकर्माले लेख्ने भएका छन।

‘दि पाल्म ग्रुप’ले निर्माण गरेको चलचित्र ‘टुल्की’ ले यसै वर्ष चलचित्र विकास बोर्डले प्रदान गरेको ‘विशेष चलचित्र पुरस्कार’ जित्न सफल भएको थियो। सामाजिक कथामा नै चलचित्र बनाउन रुचि राख्ने निर्माता लामाले ‘लुसु’ पनि विशेष रहने बताए। नवराज श्रेष्ठले निर्देशन गर्ने चलचित्रमा अजय स्यांङतान मुख्य सहायक निर्देशक रहनेछन्।

नृत्य निर्देशन तथा कलाकारको भूमिकामा लिगेश भट्टराई अनुबन्धित भएका छन्। चलचित्रमा काम गर्ने अन्य कलाकार तथा प्राबिधिक छनोट कार्य भई रहेको निर्माता लामाले बताए। चलचित्रको बारेमा अन्य जानकारी छिट्टै प्रेस रिलिज मार्फत दिइने निर्माण टिमले जानकारी दिएका छन।