स्रोत नखुलेको रकम र ब्राउन सुगरसहित सुनसरी सीमा क्षेत्रबाट ३ जना पक्राउ

विराटनगर । सुनसरीको सीमा क्षेत्रबाट सशस्त्र प्रहरी बलको टोलीले स्रोत नखुलेको रकमसहित एकजना पक्राउ परेका छन् । टोलीले कोशी गाउँपालिका-३ का २७ वर्षीया वीरेन्द्रकुमार राउतलाई २१ लाख ५७ हजारसहित पक्राउ गरेको हो ।

लौकही बीओपीको टोलीले भोक्राहा नरसिंह गाउँपालिकास्थित पूर्व पश्चिम लोकमार्ग हुदै प्रदेश १-०२-०५३५ १९५६ नम्बरको मोटरसाइकलमा इनरुवातर्फ जाँदै गरेका राउतको साथ खानतलासी गर्दा उक्त रकम बरामद गरिएको साथै थप कारबाहीका लागि राजश्व अनुसन्धान कार्यालय इटहरीमा बुझाइएको सशस्त्र प्रहरी बल, ४ नम्बर गणका गणपति सप्रउ लकेशकुमार तुम्बाहाङ्गफेले बताए ।

त्यस्तै कोशी-१ लौकहीस्थित लौकही ‌बोर्डर इलाकामा भारतबाट नेपालतर्फ को. ३४ प ७०१९ नम्बरको बुलेट मोटरसाइकलमा आइरहेका २ जनाबाट ब्राउन सुगर र केही नगद बरामद गरिएको छ । बराहक्षेत्र-३ का २७ वर्षीय पुष्प श्रेष्ठ र २२ वर्षका विवश श्रेष्ठबाट १८ ग्राम ब्राउन सुगर र २६ हजार ७५० रुँपैया साथै मोबाइल बरामद गरिएको एपीएफले जनाएको छ ।