घुस मागेपछि कुटिए कपिलवस्तु मालपोतका कर्मचारी

रूपन्देही । फाइल खोल्न घुस मागेको भन्दै कपिलवस्तु मालपोतका कर्मचारी कुटिएका छन् । भूमि सुधार तथा मालपोत कार्यालय कपिलवस्तुका मोठ फाँटमा कार्यरत करार सेवाका कार्यालय सहयोगी निरज कँडेलमाथि कुटपिट भएको हो । कपिलवस्तु जिल्लाको बुद्धभूमि नगरपालिका वडा नम्बर ६ महुवाका सर्वजित् मिश्राले कँडेललाई कुटपिट गरेका हुन् ।

कँडेललाई कुटपिट पश्चात मिश्रा कार्यालयबाट बाहिरिएर सम्पर्कविहीन बनेका थिए । कुटपिटका कारण कँडेलको निधारको देब्रे भागमा चोट पटक लागेको छ । दुवैबीचको आपसी असमझदारीले कुटपिटको घटना भएको हुन सक्ने लेखापढी व्यवसायीहरू बताउँछन् ।

यता घटना पछि जिल्ला प्रहरी कार्यालय कपिलवस्तु र वडा प्रहरी कार्यालय तौलिहवाको प्रहरी टोली कार्यालयमा पुगेको छ । कार्यालयले मिश्राविरुद्ध प्रशासनमा उजुरी दिने तयारी गरेको छ । कुटपिटको घटना आफैंमा गलत भएको भए पनि कुटपिट भएका कर्मचारी कँडेलको कार्यशैली प्रति अधिकांश लेखापढी व्यवसायी असन्तुष्ट रहेको दाबी छ ।

कुनै फाँटबाट अर्को फाँटमा फाइल पुर्याउँदा कँडेलले खुलम खुला घुस माग्ने गरेको लेखापढी व्यवसायीले आरोप लगाए । यता कार्यालयका कर्मचारीमाथि सांघातिक आक्रमण गर्ने व्यक्ति उपर कडाभन्दा कडा कारबाहीको माग अगाडि बढाइने कार्यालयका प्रमुख मालपोत अधिकृत देवी बहादुर भण्डारीले बताए ।

प्रमुख भण्डारीले आफू आएपछि घुसखोरी तन्त्र समाप्त परेको बताए । कहीँ त्यसो भएको खण्डमा आफूलाई भन्न सार्वजनिक सूचना प्रकाशन गरेको उनले बताए ।