इन्डियन आइडल टप ११ मेनुका पौडेलको स्वरमा ‘बादलुमाथि’ सार्वजनिक

काठमाडौं । भारतीय रियालिटी शो इन्डियन आइडलको टप ११ मा पुगेर चर्चाको शिखरमा रहेकी गायिका मेनुका पौडेलको स्वरमा ‘बादलुमाथि’ बोलको नयाँ गीत सार्वजनिक भएको छ ।

रेबेल क्रिएशनले बजारमा ल्याएको गीतमा पौडेललाई चर्चित गायक राजनराज शिवाकोटीले साथ दिएका छन् । गीतमा शिवाकोटीकै शब्द तथा सङ्गीत रहेको छ ।

गीतको भिडियो सम्पादन नकुल खड्काले गरेका छन् । रेबेल क्रियशनले गीतको अफिसियल भिडियोसमेत छिट्टै ल्याउने बताएको छ । नेपाली चेलीलाई भारतीय भूमिका मिलिरहेको सफलतालाई थप ऊर्जा मिलोस् भनेर आफूहरूले यो गीत सार्वजनिक गरेको गीतका निर्माता गगनलाल प्रधानले बताएका छन् ।

गायक शिवाकोटीले मेनुकाको प्रतिभालाई सही समयमै स्रोतामाझ पुर्‍याउन आफूहरूले यो गीत बजारमा ल्याएको बताए ।

‘मेनुकाले जुन सफलता हासिल गरिरहेकी छन्, त्यो सफलतामा यो गीतले अझै ऊर्जा भर्नेछ भन्ने विश्वास लिएको छु’, शिवाकोटीले भने ।

इन्डियन आइडलमा सङ्गीतकी साक्षात् स्वरूप भनेर परिचय बनाएकी पौडेलको यो गीतले उनको ‘साङ्गीतिक उडान’मा थप सफलता मिल्ने विश्वास आफूले लिएको उनले बताए ।