प्रिमियरमा ‘चित्रा’ले पायो सबैबाट तारिफ

काठमाडौं । यही शुक्रबार प्रदर्शनमा आउने चलचित्र ‘चित्रा’ को प्रिमियर गरिएको छ । सोमबार काठमाडौंमा गरिएको प्रिमियरमा नेपाली फिल्मकर्मी तथा पत्रकारहरुको बाक्लो उपस्थिति थियो ।

डेब्यु अभिनेता सन्तोष अधिकारीको ‘चित्रा’ को प्रिमियरमा कलाकारहरु गौरी मल्ल, भुवन केसी, नरेश पौड्याल, निर्मल शर्मा, प्रदीप भारद्वाज, नरेन खड्का, रोहित रुम्बा, निर्मात्री शर्मिला पाण्डे, निर्देशक दीपेन्द्र के खनाल, ज्ञानेन्द्र देउजा, नवल नेपाल, निर्देशक तथा अभिनेता सुरज पाण्डेलगायतको उपस्थिति थियो ।

प्रिमियरपछि अधिकांशले चलचित्र राम्रो बनेको र कथा मनपरेको प्रतिक्रिया दिए । चलचित्र विकास बोर्डका अध्यक्ष भुवन केसीले डेब्यु अभिनेता सन्तोषको काम डेब्युको जस्तो नभइ काम गरिरहेका कलाकारको जस्तै भएको बताए ।

‘काम हेर्दाखेरि नवनायकको जस्तो देखिँदैन । सन्तोषले पहिलादेखि अभिनय गरिरहेको जस्तो देखिन्छ । बधाई छ मेरो भाइलाई’, भुवनले भने ।

उनले प्रमोद अग्रहरीको पनि तारिफ गरे । केसीले फिल्म रमाइलो भएको बताउँदै आफू इमोशनल बनेको बताए ।

आफूलाई चलचित्रको कथा मनपरेको बताएकी अभिनेत्री गौरी मल्लले चलचित्रमा छोरीको भूमिका निभाएका आयुशी ढकाल र सिम्रन खड्काको अभिनयबाट प्रभावित भएको बताइन् ।

निर्मात्री, निर्देशक तथा अभिनेत्री दीपाश्री निरौलाले डेब्यु अभिनेता सन्तोषले राम्रो काम गरेकोमा बधाई दिइन् । उनले पनि बाल कलाकार आयुशी ढकाल र अभिनेत्री सिम्रन खड्काको तारिफ गरिन् ।

निर्देशक नरेश पौड्यालले चलचित्रले इमोशनमा विविधता दिएको भन्दै तारिफ गरे । उनले अन्य कलाकारको काम राम्रो रहेको बताउँदै प्रमोद र सिम्रन खड्काको अभिनय बहुतै राम्रो लागेको बताए ।

पारिवारिक कथा पेस गर्ने ‘चित्रा’मा डेब्यु अभिनेता सन्तोषसँगै प्रमोद अग्रहरी, अर्पण थापा, मेनुका प्रधान, शुभेच्छा खड्का, प्रकाश घिमिरे, अञ्जना बराइली, सिम्रन खड्का, आयुशी ढकाल, कुमार गुरुङ, उज्ज्वल ढकालको पनि अभिनय छ ।

महेश पौडेलको छायांकन रहेको चलचित्रमा राजनराज सिवाकोटीको संगीत छ । मनिष गौतमको पटकथा एवं संवाद लेखन छ । निर्देशक घनश्याम लामिछाने छन् ।

चलचित्रका निर्माता आशिष थापा मगर हुन् भने सन्तोष अधिकारी कार्यकारी निर्माता हुन् । चलचित्रको एसोसिएट निर्मातामा राज श्रेष्ठ छन् । चलचित्रमा बनिश शाह र सन्देश शाहको संयुक्त सम्पादन रहेको छ ।

चलचित्रको नेपालभरको वितरणको जिम्मा केदार पराजुलीको ‘श्री कृष्ण फिल्म्स’ले लिएको छ । चलचित्रको अष्ट्रेलियाको अधिकार भने अविनाश रोका मगरले लिएका छन् ।