र्‍याप गीतको महायुद्ध​ ‘र्‍याप व्याटल नेपाल’ प्रसारणमा आउँदै

काठमाडौं । र्‍याप गीतको महायुद्ध ‘र्‍याप व्याटल नेपाल’ टेलिभिजन रियालीटी शो प्रसारणमा आउने भएको छ ।

बुधबार आयोजक युजिसा इन्टरनेशल र सह आयोजक राज्य मिडिया नेटवर्कले पत्रकार सम्मेलन आयोजना गर्दै टेलिभिजन रियालीटी शो प्रसारणमा आउने बताएको हो ।

एपी वान टेलिभिजनबाट प्रसारणमा आउन लागेको ‘र्‍याप व्याटल नेपाल’ आयोजक कम्पनी युजिसा इन्टरनेशलका एक्जिक्युटिभ डाईरेक्टर सानु खानले बताए ।

उनले भने, ‘एपीवान टेलिभिजनबाट आगामी अप्रिलदेखी र्‍याप व्याटल नेपाल प्रसारण हुनेछ, हामी हाल अडिसनको तयारीमा जुटेका छौँ, फेव्रवरीबाट अडिसन सुरु गर्नेछौं ।’

शो का ईभेण्ट निर्देशकसमेत रहेका खानले नेपाली सांगितिक फाँटसहित बलिउड फिल्म नगरीबाटसमेत अतिथि जर्ज निर्णयककारुपमा रहने उनले बताए ।

‘र्‍याप व्याटल नेपाल’ को अडिसन नेपालका प्रमुख शहर काठमाडौं, पोखरा, झापा, ईटहरी, चितवनसहित सिमापारी दार्जिलिङ, सिलिगुढि र सिक्किममा पनि गर्ने कार्यक्रम रहेको ईभेण्ट डाईरेक्टर डेभिल सिंह राजपुतले बताए ।

शो को अडिसन दार्जिलिङ्गमा माघ २५, सिक्किममा माघ २७, सिलिगढीमा माघ २९, झापामा फाल्गुण ०२, ईटहरीमा फाल्गुण ०५, चितवन फाल्गुण ०९, पोखरा फाल्गुण १२ र काठमाण्डौंमा १८ एवं १९ गते गर्ने तय गरिएको छ ।

त्यस्तै, सह आयोजक कंपनी राज्य मिडिया नेटवर्कका अध्यक्ष एवं ईभेण्ट सल्लाहकार सरोज ओझाले युवासहित सबै किसिमका दर्शकलाई सांगितिक माहौलमाझ रम्ने वातावरण शोले दिने बताए ।

‘युवासहित सबै किसिमका दर्शकलाई सांगितिक माहौलमाझ रम्ने वातावरण यस शोले दिनेमा हामी विश्वस्त छौँ, त्यसबाहेक पनि युवाहरुलाई स्वदेशभित्रै रहेर केही गर्न सन्देश दिने उदेश्य यस शो ले बोकेको छ’, ओझाले भने ।

विश्वभर छरिएर रहेका नेपाली भाषीहरुको लागि डिजिटल अडिसन गरिने राजपुतले बताए ।