बक्यौता नतिरी उद्योगको लाइन जोडे फेरि काटिदिने कुलमानलाई कर्मचारी संगठनको चेतावनी

काठमाडौं । नेपाल विद्युत प्राधिकरणका ४ कर्मचारी संगठनले बक्यौता बाँकी उद्योगहरूले महसुल नबुझाइ लाइन जोडिदिएका पुन: काटिदिने चेतावनी दिएका छन् ।

प्राधिकरणअन्तर्गतको कर्मचारी कल्याण परिषद, कर्मचारी युनियन, राष्ट्रिय कर्मचारी युनियन र कर्मचारी संघले बक्यौता नउठाइ विद्युत जोडे पुन: काट्ने बताएका हुन् । ४ संगठनले कार्यकारी निर्देशक कुलमान घिसिङलाई ध्यानाकर्षण पत्र बुझाउँदै कुनै हालतमा लाइन काटिएका उद्योगहरूमा विद्युत लाइन नजोड्न भनेका छन् ।

‘अदालतले समेत विद्युत महसुल असुलउपर गर्न आदेश दिइसकेको अवस्थामा समेत हाल नेपाल सरकारले विद्युत महसुल रकम नबुझाई उद्योगहरूको लाइन जोड्ने निर्देशन दिइएको भन्ने बुझिन आएको छ । लाइन जोडिएमा हामी पुनः त्यस्ता उद्योगहरूको लाइन काट्न बाध्य हुनेछौं’, संगठनको ध्यानाकर्षण पत्रमा उल्लेख छ ।

डेडिकेटेड फिडर तथा ट्रक लाइनमार्फत विद्युतउपभोग गर्ने उद्योगीहरूले भुक्तानी गर्नुपर्ने विद्युत महसुलको विषय विगत लामो समयदेखि विवाद गरेर विभिन्न शक्ति केन्द्रहरूको प्रयोग गरी / गराई महसुल नतिर्ने प्रपञ्च भइरहेको भन्दै यसमा आफूहरूको गम्भीर आपत्ति रहेको उनीहरूको भनाइ छ ।

डेडिकेटेड र ट्रंक लाइनको बक्यौता छानबिनका लागि मन्त्रिपरिषदको बैठकले समिति बनाउनुको साथै उद्योगहरूको काटिएको विद्युत् हाललाई जोड्न निर्देशन दिएको थियो ।

प्राधिकरणले ५ करोड रुपैयाँभन्दा बढी बक्यौता तिर्न बाँकी रहेका २४ उद्योगको लाइन काटेको थियो । भने, ६१ वटा उद्योगले २४ अर्बभन्दा धेरे बक्यौता तिर्न बाँकी रहेको बताएको थियो ।