सरकारको कामप्रति प्रधानमन्त्री नै असन्तुष्ट, भन्छन्- तार्गेट पूरा गर्न नसक्ने अब सबै हट्छन् (भिडिओ)

काठमाडौं । प्रधानमन्त्री पुष्पकमल दाहाल ‘प्रचण्ड’ ले आफैँले नेतृत्व गरेको सरकारको कामसँग सन्तुष्ट हुन नसकेको बताएका छन् । अर्घखाँची पर्यटन विकाससम्बन्धी नेपाल पत्रकार महासंघले आयोजना गरेको कार्यक्रममा उनले अर्थतन्त्र सुधारदेखि सुशासनको क्षेत्रमा धेरै काम अगाडि बढाइरहेको बताए ।

उनले भने, ‘सरकारले अर्थतन्त्र सुधारदेखि सुशासनको पक्षमा धेरै काम गरिरहेका छन् । तर, राष्ट्रको अपेक्षाअनुसार पूरै सन्तुष्ट छैन । अर्को बर्ष अझै तीव्र गतिमा काम गर्ने प्रतिबद्धता गरेको छु । तपाईंहरूले देख्नुभएकै छ म आजकाल १० बजे नै मन्त्रालय पुग्छु सबै मन्त्रालयको ब्रिफिङ लिन्छु, उनीहरूलाई कामको तार्गेट दिन्छु त्यो एक महिनाभित्र सकेनन् भने तीनिहरूलाई हेरफेर गर्नेसम्मको प्रतिबद्धता गरेको छु ।’

उनले आफ्नै कार्यशैलीबाट सरकारको कामलाई सुधार्ने प्रयास गरेको बताए ।

प्रचण्डले संघीय निजामती ऐन र प्रहरी समायोजनाको काम आफू नेतृत्वको सरकारले नगरे अरुले गर्न नसक्ने देखेको बताए ।

प्रधानमन्त्रीले भने, ‘प्रदेशहरूलाई बलियो अधिकार दिनको लागि संघीय निजामती ऐनलाई चाँडै पारित गर्छौं, प्रहरी समोजन ऐन पनि अगाडि बढिसकेको छ । मेरो नेतृत्वमा संघीय निजामती ऐन बनेन प्रहरी, समायोजन कार्यान्यन भएन भने या संघीय शिक्षा ऐन अगाडि बढेन भने मलाई डर छ अरुबाट यो काम हुँदैन ।’