भोलिका दिनमा पनि मिलेर अगाडि बढ्नसक्ने ठाउँ राखेर गठबन्धनमा मिलेर बसेका छौं : देउवा

काठमाडौं । नेपाली कांग्रेसका सभापति शेरबहादुर देउवा संविधान अनुसार कुनै पार्टीको एकल बहुमत आउने अवस्था नभएपछि गठबन्धन गर्नुपरेको बताएका छन् । कांग्रेस स्याङजा जिल्ला सम्मेलनलाई सम्बोधन गर्दै गठबन्धन गरेपछि आफूहरु मिलेर बसेको बताए ।

उनले भने, ‘अहिले धेरै साथीहरु किन अरु पार्टीसँग मिल्ने भन्छन् अहिलेको संविधान अनुसार कुनै पार्टीको पनि बहुमत आउन गाह्रो छ । समानुपातिक र समावेशी व्यवस्था छ । सबैलाई राजनीतिमा ल्याउनुपर्छ । चुनाव जित्न नसक्नेहरुलाई समानुपाति समावेशी सिद्धान्तबाट ल्याउनुपर्छ ।’

एउटै पार्टीको बहुमत आउन गाह्रो भएपछि कुनैपनि पार्टीसँग मिल्नुपर्ने आवश्यकता बनेको बताए ।

उनले थपे, ‘गठबन्धन हाम्रो बाध्यता हो । अहिले गठबन्धनको सरकार बनेको छ । हामीलाई त्यस्तो कुनै समस्या छैन । मिलेर बसेका छौं भोलिका दिनमा मिलेर अगाडि बढ्ने ठाउँ छ ।’