अध्यागमन अधिकृतसँग हातपात गर्ने प्रहरीको ड्यूटी स्थान सारियो

काठमाडौं । अध्यागमन अधिकृतसँग विवाद गर्ने प्रहरीहरुलाई घटना भएको स्थानबाट ड्यूटी सारिएको छ । असई सन्दीप तामाङसहितका प्रहरी कर्मचारीहरुलाई तत्काल घटना भएको स्थानमा नखटाइएको र विमानस्थलकै अन्य क्षेत्रमा ड्यूटी सारिएको प्रहरी स्रोतले जानकारी दिएको छ ।

‘भर्खरै घटना भएको र सम्भावित विवादलाई ध्यानमा राखेर उहाँहरुलाई त्यस स्थानमा ड्यूटी नराखिएको हो’, विमानस्थल प्रहरी अभिकारीले भने ।

शुक्रबार चेकजाँचका क्रममा अध्यागमनका अधिकृत तथा प्रहरीबीच हात हालाहालको अवस्था सिर्जना भएको थियो । त्यसको विरोधमा कर्मचारीहरुले प्रहरीमाथि कारबाहीको माग गरेका छन् भने प्रहरीले भने कर्मचारीले हातपात गरेपछि घटना भएको बताउँदै आएको छ ।