एसएसपीमा बढुवा भएका बस्नेतलाई दर्ज्यानी चिन्ह प्रदान

काठमाडौं । नेपाल प्रहरीको प्रहरी उपरीक्षक (एसपी)बाट प्रहरी वरिष्ठ उपरीक्षक (एसएसपी) पदमा बढुवा भएका रमेशकुमार बस्नेतलाई दर्ज्यानी चिन्ह प्रदान गरिएको छ । प्रहरी महानिरीक्षक बसन्तबहादुर कुँवरले प्रहरी प्रधान कार्यालयमा बुधबार आयोजित एक समारोहबीच उनलाई दर्ज्यानी चिन्ह प्रदान गरेका हुन् ।

दर्ज्यानी चिन्ह प्रदान गर्दै प्रहरी महानिरीक्षक कुँवरले ‘प्रहरी साथमा छ’ बोलको अपराध न्यूनीकरण सम्बन्धी जनचेतनामूलक म्युजिक भिडियोको पनि विमोचन गरेका छन् । उक्त म्युजिक भिडियोको परिकल्पना प्रहरी अतिरिक्त महानिरीक्षक (एआईजीपी) टेकबहादुर तामाङले गरेका हुन् भने रचनाकार दिल शिरिष र प्रकाश सपूत रहेका छन् । सपूत र सुदिप सागरको संगीत तथा सपूत र सुनिता दुलालको गायन रहेको उक्त म्युजिक भिडियोको निर्देशन आरन प्रोडक्सनबाट सुनिल बिकले गरेका हुन् ।

साथै त्यसै अवसरमा प्रहरी महानिरीक्षक कुँवरले प्रहरी प्रधान कार्यालय अपराध अनुसन्धान विभागले प्रकाशन गरेको ‘नेपाल प्रहरीले अनुसन्धान गरेका चर्चित घटनाको सङ्ग्रह–भाग १’ पुस्तकको विमोचनसमेत गरेका छन् । उक्त पुस्तकमा रहेका घटनाको संकलन तथा लेखन प्रहरी नायव उपरीक्षक (डीएसपी) रबिन्द्रनाथ पौडेल, बेदप्रकाश जोशी, पंचकुमार बाखु र प्रहरी निरीक्षक (इन्सपेक्टर) राजु अधिकारीले गरेका हुन् ।

साथै प्रहरी महानिरीक्षक कुँवरले पुस्तक लेखनमा संलग्न प्रहरी अधिकृतलाई सोही अवसरमा सम्मान पनि गरेका छन् । समारोहमा प्रहरी अतिरिक्त महानिरीक्षक, प्रहरी नायव महानिरीक्षक (डीआईजीपी), वरिष्ठ प्रहरी अधिकृत एवं प्रहरी अधिकृतको उपस्थिति रहेको थियो ।