ब्रह्मानन्दमको जन्मदिनमा ‘ह्रस्व दीर्घ’को रिलिज डेट घोषणा, आगामी दशैंमा हलमा लाग्ने

काठमाडौं । अभिनेत्री नीता ढुंगानाको महत्त्वाकाङ्क्षी प्रोजेक्ट ‘ह्रस्व दीर्घ’ २०८१ साल असोज ११ गते प्रदर्शनमा आउने भएको छ । दक्षिण भारतीय चलचित्र उद्योगका लोकप्रिय कलाकार ब्रह्मानन्दमको जन्म दिनको अवसर पारेर ह्रस्व-दीर्घ युनिटले रिलिज डेट घोषणा गरेको हो ।

सिनेमामा नीता ढुङ्गाना तथा हरिहर अधिकारीको मुख्य भूमिका रहेको छ भने भारतीय कलाकारहरू ब्रह्मानन्दम, प्रदीप रामसिंह रावत, अली, सुनिल कुमारलगायतको समेत अभिनय रहनेछ ।

चन्द्र पन्त सिनेमाका निर्देशक हुन् । चार सेड्यूलमा छायाँकन हुने सिनेमाको भारतका विभिन्न सहरहरूमा हुने छाया‌ंकन सकिएको छ भने हाल नेपालमा छायांकन भइरहेको छ । सिनेमाको काम गर्न यसमा अनुबन्धित भएका भारतीय कलाकार केही दिनमा नेपाल आउँदैछन् ।

सिनेमालाई नेपाल तथा भारतका मुख्य भाषाहरूमा रिलिज गरिने बताइएको छ । भारतमा भने सिनेमा ओटीटी प्लेटफर्ममा मात्र रिलिज हुनेछ ।