आफ्नै मृत्युको भ्रम फैलाएकी पुनम पाण्डेविरुद्ध उजुरी, अपराधअनुसारको कारवाही गर्न माग

काठमाडौं । आफ्नो मृत्युको भ्रम फैलाएकी अभिनेत्री पुनम पाण्डेविरुद्ध मुम्बई प्रहरीमा उजुरी परेको छ । आफ्नै इन्स्टाग्राम ह्याण्डलबाट आफ्नो मृत्युको खबर फैलाएकी पाण्डेविरुद्ध अधिवक्ता काशिल खानले उजुरी दर्ता गराएको आजतकले जनाएको छ ।

अधिवक्ता खानले उनकी म्यानेजर निकिता शर्मा र एजेन्सी हटरफ्लाईविरुद्ध आइपीसी सेक्सन ४१७, ४२०, १२० बी र ३४ अनुसार कारवाही हुनुपर्ने माग गरेका छन् ।

पुनमको यो कार्य सर्वसाधारणलाई धोखा दिने र झुक्याउने किसमको भएकाले उनकोअपराधअनुसार कारबाही गर्न उजुरीमा माग गरिएको छ । उनलाई दर्शक तथा शुभचिन्तकको भावनामा चोट पुर्याएको र सर्भिकल क्यान्सर झुट बोलेको आरोप लगाइएको छ भने भारतीय सिनेवर्कस् एसोसिएसनले पनि पाण्डेविरुद्ध एफआईआर चलाउन भन्दै मुम्बई प्रहरीमा उजुरी दिएको छ ।

केही दिन अघिमात्र पुनमले आफ्नै इन्स्टाग्राम ह्याण्डलबाट सर्भिकल क्यान्सरका कारणआफ्नो मृत्यु भएको जानकारी गराएकी थिइन् । उनको मृत्युको खवरले सबैलाई स्तब्ध पारेको थियो। बलिउडका अधिकतम कलाकार र शुभचिन्तकहरुले उनलाई श्रदाञ्जली प्रकट गरेका थिए ।

तर त्यसको भोलिपल्ट शनिबार पुन उनले आफू जीवितै रहेको खबर पोस्ट गरिन् । पाठेघरको मुखको क्यान्सरविरुद्ध सचेतना फैलाउन आफूले प्र्यांक गरेको उनको दाबी थियो। त्यसपश्चात सम्पूर्ण बलिउड, दर्शक र उनका शुभचिन्तक उनीप्रति आक्रोशित छन् ।