सिन्धुलीमा ‘सिटामोल’को छायांकन

काठमाडौं । राज बहादुर सानेको निर्देशनमा निर्माण भइरहेको सिनेमा ‘सिटामोल’को छायांकन अहिले धमाधम सिन्धुलीमा भइरहेको छ । निर्माण टिमले दिएको जानकारी अनुसार अहिलेसम्म सिनेमाको करिब ५० प्रतिशत छायांकन सकिएको हो ।

सिनेमाको छायांकन निकै राम्रो र रमाइलो भएको भन्दै निर्देशक राज बहादुर सानेले खुशी व्यक्त गरेका छन् । अहिलेकै स्पिडमा काम भएको खण्डमा काम तीजमा रिलिज टार्गेट राखिएको निर्देशक साने बताउँछन् ।

विगत एक हप्तादेखि भइरहेको छायांकनको सेटबाट अभिनेता सौगात मल्ल र अभिनेत्री बेनिशा हमालको लुक्स सार्वजनिक भएको छ ।

सार्वजनिक लुक्समा अभिनेता मल्ललाई हातमा बैसाखी र भाले बोकेर बेनिशासँग उभिएका छन्, भने बेनिशाले बच्चा बोकेकी छन् । यो तस्बिरबाट सिनेमामा उनीहरू श्रीमान्-श्रीमतीको रूपमा प्रस्तुत भएको बुझ्न सकिन्छ । माओवादी जनयुद्धको कथा सिनेमाले उठान गरेको बुझिएको छ । सार्वजनिक लुक्सबाट सौगातलाई जनयुद्धको घाइतेको रूपमा हुनसक्ने बुझिन्छ ।

सिनेमामा उनीहरूका अलावा लोकेन्द्र लेखक पनि मुख्य भूमिकामा काम गरेका छन् । बाबुल गिरीको संगीत रहेको सिनेमालाई दिव्य सुवेदीले खिचिरहेका छन् । सिनेमामा भूगोल कुमार कार्की निर्माता, रामचन्द्र उपाध्याय, अप्सरा नेपाली, गंगाराम श्रेष्ठ, अजय कुमार बिक र कुमार केसी कार्यकारी निर्माता रहेका छन् ।