सुवेदीले जिते शिव रेग्मी सर्वोत्कृष्ट निर्देशक अवार्ड, ‘सतीदेवी’ सर्वोत्कृष्ट चलचित्र

चितवन । ‘सौराहा दक्षिण एसियाली चलचित्र महोत्सव २०८०’ मा सर्वोत्कृष्ट चलचित्रको उपाधी ‘सतीदेवी’ ले प्राप्त गरेको छ। क्याराभान नेपालको आयोजनामा माघ १८ देखि २२ गतेसम्म पर्यटकीय नगरी चितवनको सौराहामा भएको महोत्सवमा ‘सतीदेवी’लाई सर्वोत्कृष्ट चलचित्र उपाधी प्रदान गरिएको हो। चलचित्रले सर्वोत्कृष्ट चलचित्रको उपाधीसँगै ५० हजार रूपैयाँ नगद पुरस्कार समेत जितेको छ ।

शिव रेग्मी सर्वोत्कृष्ट चलचित्र निर्देशक उपाधी पनि ‘सतीदेवी’बाटै निर्देशक लक्ष्मण सुवेदीले प्राप्त गरेका छन् । प्रतिस्पर्धामा सहभागिता जनाए तापनि चलचित्र सार्वजनिक रुपमा प्रदर्शनमा आउन भने बाँकी नै छ ।

यसै गरी, सर्वोत्कृष्ट सिनेमाटोग्राफरको उपाधी ‘चलचित्र‘बिच्छेद’बाट संकल्प भुजेलले, सर्वोत्कृष्ट चलचित्र लेखनको उपाधी ‘चलचित्र‘बिच्छेद’बाटै सत्यराज चौलागाईले, ‘जुरी इन्करेजमेन्ट अवार्ड’ रोशनकुमार श्रेष्ठद्धारा निर्देशित गीति चलचित्र ‘भाग्य’ले, सर्वोत्कृष्ट वृत्तचित्रको उपाधी डा।सचिन घिमिरे र गौरव केसीद्धारा निर्देशित चलचित्र ‘म अलप हुन चाहन्छु’ ले, सर्वोत्कृष्ट लघु चलचित्रको उपाधी नगद २५ हजार पुरस्कारसहित प्रदीप पोखरेलले निर्देशन गरेको ‘स्नो लियो पार्ड’ले रसर्वोत्कृष्ट सम्पादकको उपाधी ‘नांगो गाउँ’बाट बनिशा शाहले प्राप्त गरेका छन ।

महोत्सवमा दक्षिण एसियाली देशका ४० भन्दा बढी चलचित्रले सहभागिता जनाएका थिए। जसमध्ये २० वटा चलचित्र प्रदर्शन गरिएको थियो। महोत्सवको समापनमा बागमती प्रदेशकी सदस्य गीता गुरूङले सम्मान र नगद पुरस्कार हस्तान्तरण गरेकी थिइन्। चलचित्रको निर्णायक समितिको संयोजकमा वरिष्ठ वृत्तचित्र निर्देशक एवं सम्पादक लव प्याकुरेल रहेका थिए ।

कार्यक्रमको उद्घाटनमा निर शाह, शिव श्रेष्ठ, प्रकाश सायमी, रविन्द्र खड्का, गायिका ऋतु कडेँल, गायक हिमाल सागर लगायतका चलचित्रकर्मीहरू उपस्थित थिए । भने महोत्सवमा ‘प्रकाश’, ‘सतीदेवी’, ‘विछेद’, ‘महानगर’, ‘वेलकम टु हेम्जाकोट’, ‘भाग्य’, ‘चारधाम’, ‘लिलामे माइला’, ‘म अलप हुन चाहन्छु’, ‘वाइल्ड फायर’, ‘भुसको लोग्ने’, ‘खाग’, ‘गाली मन्त्र’, ‘आइ लभ यू मम’, ‘हमर पहिचान’, ‘ग्रेट फादर’, ‘किर्यापुत्री’, ‘वनकरिया’ र हिन्दी भाषाको चलचित्र ‘घटना’ लगायत प्रदर्शन गरिएको थियो ।