पारससँगको जम्काभेटबारे दीपकराज- बाटोमा सामान किन्दै हुनुहुन्थ्यो, देखेर गाडी रोकें

काठमाडौं । ‘छक्का पञ्जा ४’ को अपार सफलतापछि यतिबेला अभिनेता, लेखक तथा निर्माता दीपकराज गिरी चलचित्र ‘छक्का पञ्जा ५’को स्क्रिप्ट लेखनमा व्यस्त छन् । उनी चलचित्रको स्क्रिप्टकै लागि यतिबेला पोखरा पुगेका छन् ।

उनले तीन दिनअघि पोखराबाटै पूर्वयुवराज पारस शाहसँगको आफ्नो तस्विर सामाजिक सञ्जालमा पोष्ट गरेका थिए । तस्विरसँगै उनले सानो स्टाटस पनि लेखेका छन् । जसमा लेखिएको छ- ‘पद र पावरवाला व्यक्तिसँग राजनीति बुझ्न सकिन्छ । तर, यी दुवै नभएको मान्छेसँग जीवन बुझ्न सकिन्छ ।’

तस्विरमा दीपकराज गिरी र पूर्वयुवराज पारस शाहसँगै निर्देशक तथा निर्माता दिनेश डीसी पनि देखिएका छन् । नयाँ चलचित्रको स्क्रिप्ट लेखनका लागि पोखरा पुगेका दीपकको पोखराको लेकसाइडमा पारससँग अचानक जम्का भेट भएको थियो । पारसलाई देखेपछि उनीसँग गफ गर्न दीपक आफ्नो गाडीबाट ओर्लिएका थिए ।

उनी सुनाउँछन्, ‘उहाँहरु जस्तो मानिसहरुसँग भेट्दा अनि कुरा गर्दा आनन्द लाग्छ । राजपरिवारसँग म प्रायः भेटिरहेको हुन्छु । उहाँहरुसँग राजनीतिभन्दा परका अरु धेरै कुरा बझ्न पाइन्छ । त्यसैले उहाँलाई देखेपछि मैले गाडी रोकें । हामी तीनजनाले त्यही सडकमा उभिएर केही समय कुरा ग¥यौं । एकछिनमा हामीलाई देखेर मान्छेहरु भेला हुन थाल्नुभयो । त्यसपछि भीड होला भनेर हामी छुट्टियौं ।’

यो भन्दा अगाडि पनि पारससँग धेरै पटक जम्काभेट भएको दीपकको भनाइ छ । उनी भन्छन्, ‘जम्काभेट धेरै भएको छ । तर, बसेर लामो कुराकानी भने हुन पाएको छैन । पार्टी वा समारोहतिर भेट हुँदा उहाँसँग केही गफ गर्ने मौका मिलेको छ ।’

पारस एकदमै सामान्य जीवन बिताउने व्यक्तित्व रहेको दीपकको अनुभव छ ।

‘समारोहमा कोही आफूभन्दा ठूलो मान्छे भेट्नुभयो भने उहाँले दाइ नमस्कार भन्नुहुन्छ । लेकसाइडमा भेट्दा पनि उहाँ बाटोमा सामान किन्दै हुनुहुन्थ्यो । उहाँ दरबारबाट हुर्किएको मानिस हो । किस्मतले युवराज बनाइदियो र त्यही किस्मतले फेरि हामी जस्तो साधारण मान्छे बनाइदियो । जिन्दगीको ठूलो उतारचढाव देखेको मान्छे हो उहाँ’, उनी थप्छन्, ‘उहाँलाई कति जनाले घृणाको पात्रको रुपमा पनि लिन्छन् होला । त्यो मान्छेको आ–आफ्नो हेर्ने दृष्टिकोण हो । जिन्दगीमा घटेको ठूलो उतारचढावका कारण आएको परिस्थितिलाई सायद उहाँले पूर्ण रुपमा आत्मसात गर्न सक्नुभएन होला । तर, मलाई चाहिँ उहाँ परिस्थितिले यहाँसम्म लिएर आएको मान्छे जस्तो लाग्छ ।’

स्टाट्सबारे प्रष्ट्याउँदै दीपकले सुनाए, ‘मलाई त्यस्तो मान्छेहरुसँग तस्विर खिचाउन मनपर्छ, जसलाई जीवनको परिभाषा नजिकबाट थाहा होस् । म प्रायः पावरमा भएका मान्छेहरुसँग तस्विर खिचे पनि पोष्ट्याउन हतारिदिन्न । न पावरमा भएका व्यक्तित्वहरुको नम्वर आफ्नो फोनमा त्यति राख्न रुचाउँछु । किनकि मलाई पावरदेखि डर लाग्छ ।’

उनका अनुसार पावर गुमाएका अथवा पदबाट हटेका मान्छेसँग जीवनको ठूलो अनुभव हुन्छ । ‘पावरमा हुँदा मान्छेहरुले गर्ने व्यवहार र पावरपछिको जीवन उहाँहरुले नजिकबाट नियाल्नुभएको हुन्छ । उहाँहरुलाई भेट्न पुलिस, आर्मी, सेक्युरेटी अथवा मान्छेहरुको भीडभाड छिचोल्न पर्दैन । उहाँहरुमा कुनै चमकधमक हुँदैन । त्यसैले उहाँहरुसँग भेट्दा गफ गर्न मन लाग्छ’, दीपक सुनाउँछन् ।

राजपरिवारसँग तस्विर खिचेर हालेको देख्दा धेरैलाई उनी राजावादी हुन भन्ने लाग्नसक्छ । तर, आफू राजावादी नभएको बताउँछन् दीपक । ‘म राजावादी होइन । म कसैलाई वा कुनै पनि चिजलाई वादको आँखाले हेर्दिनँ । हरेक चिजलाई वादको आँखाले हेर्न थाले भने म पूर्वाग्रही हुन्छु’, उनी भन्छन्, ‘मलाई मनपर्ने एउटैमात्र वाद छ, त्यो हो मानवतावाद । साम्यवाद वा समाजवादभन्दा धेरै माथि हुन्छ मानवतावाद । कसैले राष्ट्रवाद पनि भन्लान् । तर, म चाहिँ मानवतावादलाई सबैभन्दा माथि राख्छु । त्यही भएर मलाई पारस सरकार देख्दा उहाँसामु गएर, भेटेर गफ गर्न मन लागेको हो । म राजावादी वा दरबारको मान्छे भएर उहाँसँग भेटेको होइन ।’