पोखरामा चैत पहिलो साता बाह्रखरी गल्फ हुने

पोखरा । बाह्रखरी गल्फ एन्ड बियोन्ड कार्यक्रम चैतको पहिलो साता पोखरामा हुने भएको छ । बाह्रखरी मिडियाले वार्षिक रूपमा आयोजना गर्दै आएको एनसेल बाह्रखरी गल्फ एन्ड बियोन्ड कार्यक्रम यस वर्ष चैत १ देखि ३ गतेसम्म पोखरामा हुन लागेको हो ।

आयोजक बाह्रखरी मिडियाले पत्रकार सम्मेलन गर्दै पोखरालाई पर्यटकीय राजधानीका रूपमा राष्ट्रिय पहिचान दिलाउन चेतना जगाउने उद्देश्यले प्रतियोगिता गर्न लागेको जनाएको छ । यस कार्यक्रमअन्तर्गत चैत १ गते पोखराको हलनचोकदेखि विजयपुर-मझेरीपाटनसम्म साइकल र्‍याली गरिनेछ ।

देशभरबाट पोखरामा भेला भएका करिब १२० कर्पोरेट गल्फका सहभागी चैत २ र ३ गते गल्फ प्रतियोगितामा प्रतिस्पर्धा हुने बाह्रखरीका कार्यकारी अध्यक्ष प्रतीक प्रधानले जानकारी दिए ।

प्रतियोगिताका अल-राउन्ड विजयीले सुनको गल्फ बल अर्थात बाह्रखरी गोल्डेन बल प्राप्त गर्नेछन् । होल इन वन गर्ने खेलाडीलाई बीवाईडीको एट्टो थ्री गाडी पुरस्कार र अन्य विजयीलाई पनि पुरस्कार व्यवस्था गरिएको आयोजकले जनाएको छ ।

चैत २ गते गण्डकीका मुख्यमन्त्री सुरेन्द्र पाण्डे र पोखरा महानगरपालिकाका मेयर धनराज आचार्यसँग गण्डकी प्रदेश तथा पोखरा महानगरको विकास र भविष्यका सम्भावनाका विषयमा छुट्टाछुट्टै अन्तरक्रिया गर्ने कार्यक्रम रहेको कार्यकारी अध्यक्ष प्रधानले सुनाए ।