यस वर्ष नहुने भयो ए डिभिजन लिग फुटबल

हेटौ‌डा । घरेलु फुटबलको मेरुदण्ड मानिने शहीद स्मारक ए डिभिजन लिग यस वर्ष नहुने भएको छ । अखिल नेपाल फुटबल संघ (एन्फा)ले सोमबार साधारणसभाबाट पारित गरेको वार्षिक क्यालेण्डरमा ए डिभिजन लिगलाई नसमेटिएपछि यस वर्ष लिग नहुने पक्का भएको हो ।

एन्फाले चालु आर्थिक वर्षमा बी र सी डिभिजन लिग भने गर्ने भएको छ । एन्फाले यो वर्ष जिल्ला लिग, महिला लिगसहितका कार्यक्रम गर्नेगरी तालिका बनाएको छ ।

एन्फाले ए डिभिजन लिग २०८१ सालको पुस १२ देखि जेठ १५ गतेसम्म गर्नेगरी तालिका बनाएको छ । डबल राउण्ड रोबिनको आधारमा हुने लिग हप्ताको तीन दिन गर्नेगरी एन्फाले तालिका बनाएको छ ।

एन्फाले फुटबल गतिविधिलाई केन्द्रमा नराखेर फुटबल राजनीतिलाई मात्र ध्यान दिएको भन्दै राष्ट्रिय टीमका खेलाडीहरु धमाधम विदेशिरहेको बेला ए डिभिजन लिग नहुँदा फुटबलमा थप समस्या आउने एन्फा साधारणसभामा प्रश्न उठे पनि नेतृत्वले ए डिभिजन लिगलाई कटौती गरेर तालिका पारित गरेको हो ।