प्रदेशस्तरीय सफ्ट टेनिसमा श्रेया र आशिष प्रथम

विराटनगर । विराटनगरमा सम्पन्न कोशी प्रदेशस्तरीय सफ्ट टेनिस प्रतियोगितामा महिलातर्फ श्रेया योञ्जन र पुरुषतर्फ आशिष बोहरा प्रथम भएका छन् ।

मोरङ जिल्ला सफ्ट टेनिस संघको आयोजनामा भएको प्रतियोगिताको फाइनलमा महिला सिंगलतर्फ श्रेया प्रथम भएकी हुन । उनले रेजिना तामाङलाई ४-१ को सेटमा पराजित गरेकी थिइन् । रेजिना दोस्रो तथा अभिलाशा लामिछाने र श्रेया राई तृतीय भएका छन् ।

यस्तै पुरुष सिंगलमा आशिषले आभाष बुढाथोकीलाई ४-२ को सेटमा पराजित गरेका हुन् । आभाष द्वितीय, मुकुन्द बुढाथोकी र अशलेश ढकाल तृतीय भएका छन् ।

महिला डबलतर्फ श्रेया योञ्जन र श्रेया राईको जोडी प्रथम र अभिलाशा लामिछाने तथा रेजिना लामाको जोडी दोस्रो भएको छ । श्रेया उपाध्याय र याना राजभण्डारी तथा मुस्कान मुन्दडा र रीया गुप्ताको जोडी तृतीय भएको छ ।

पुरुष डबलतर्फ आशिष बोहरा र आभाष बुढाथोकीको जोडी प्रथम र दीपेन्द्र थापा तथा मुकुन्द बुढाथोकीको जोडी द्वितीय भएको छ । अभिषेशअमन झा र अशलेष ढकाल तथा जयन्द्रविक्रम राणा र अमित कार्कीको जोडी तृतीय भए ।

प्रतियोगितामा ३० जना खेलाडीको सहभागिता रहेको थियो । सबै विधामा पहिलो, दोस्रो र तेस्रो हुनेलाई क्रमशः १०, ८ र ६ हजार रुपैयाँ नगद पुरस्कार प्रदान गरिएको थियो ।