सेफिल्डको पोस्टमा आर्सनलको आधा दर्जन गोल

हेटौँडा । इंग्लिस प्रिमियर लिग अन्तरग आर्सनलले लिगको पुच्छरमा रहेको सेफिल्ड युनाइटेडलाई ६-० ले हराएको छ।

एकतर्फी खेलको पाँचौँ मिनेटमा मार्टिन ओडेगार्डको गोल मार्फत आर्सनलले सुरुवाती अग्रता लिएको थियो । खेलको १३ औँ मिनेटमा सेल्फिडका जेडेन बोग्लेले आत्मघाती गोल गरेपछि आर्सनल २-० को अग्रतामा पुग्यो ।

आत्मघाती गोल खाएको सेल्फिडले त्यसको दुई मिनेटपछि गोल खायो । खेलको १५औँ मिनेटमा ग्राबियल मार्टिनेलीले गोल गर्दै आर्सनललाई ३-० को अग्रता दिलाए ।

खेलको २५औँ मिनेटमा केई हाभर्जले र ३९औँ मिनेटमा डिक्लेन राइसले गोल गरेपछि आर्सनल पहिलो हाफमा नै ५-० ले अगाडि रह्यो ।

दोस्रो हाफको ५८औँ मिनेटमा आर्सनलका बेन ह्वाइटले टोलीका लागि छैटौँ गोल गर्दै आर्सनललाई ६-० को सानदार जित दिलाए ।

जितपछि २७ खेलबाट ६१ अंक सहित आर्सनल तेस्रो स्थानमा रहेको छ ।

आर्सनलको लिग लिडर लिभरपुलभन्दा २ र दोस्रो स्थानको म्यान्चेस्टर सिटी भन्दा १ अंक मात्र कम छ । यता सेल्फिड भने २७ खेल बाट १३ अंक सहित तालिकाको अन्तिममा छ ।