पल शाह हेलिकोप्टर चार्टर गरेर रुकुम महोत्सवमा, आयोजकले खर्चिए मोटो रकम

सुर्खेत । नायक पल शाहले रुकुम पश्चिममा आयोजित महोत्सवमा प्रस्तुति दिएका छन् । उनी आज हेलिकोप्टर चार्टर गएर कार्यक्रमस्थल गएका हुन् ।

रुकुम उद्योग वाणिज्य सङ्घको आयोजना र कला संस्कृति, पर्यटन प्रवर्द्धन मञ्चको सह-आयोजनामा सञ्चालन भएको ‘रुकुम पश्चिम कृषि, व्यापार तथा सांस्कृतिक महोत्सवमा आज पलले प्रस्तुति दिएका हुन् । मुसिकोट नगरपालिका– १ खलङ्गाको बराहटाकुरामा फागुन १८ गतेदेखि महोत्सव आयोजना भइरहेको छ ।

पल शाहलाई ल्याउन हेलिकोप्टर चार्टरको व्यवस्था आयोजकले मिलाएको थियो । पलले एक लाखभन्दा बढी पारिश्रमिक पनि लिएको बताइएको छ ।

हेलिकोप्टर चार्टरका लागि ५ लाख खर्च गरिएको उद्योग वाणिज्य संघका महासचिव अनिल बुढाले नेपाल प्रेसलाई जानकारी दिए ।

बुढाले भने, ‘रुकुममा पल शाहको माग धेरै भएर हामीले ल्याएका हौं । नत्र यत्रो लगानी किन गरिन्थ्यो । लगानी उठाउन त गाह्रो छ, हामी घाटामा नै हुने हो ।’

महोत्सवमा टिकट शुल्क १ सय रुपैयाँ तोकिएको छ । आयोजकका अनुसार आज पल शाहलाई हेर्न ५ हजारभन्दा बढी दर्शककले टिकट काटेका थिए । पलले आफू अभिनित फिल्मका गीतमा नृत्य गरेर दर्शकलाई मनोरञ्जन गराए ।

पल शाह दोस्रो पटक रुकुम पश्चिम पुगेका हुन् । गत वर्ष रुकुम पश्चिमको मुसिकोटमा आयोजित र्ओ महोत्सवमा पनि उनी सहभागी भएका थिए । महोत्सव हेर्नका लागि छिमेकी जिल्ला रुकुम पूर्व, सल्यान, जाजरकोटबाट दर्शकहरु आउने गरेको महासचिव बुढाको भनाइ छ ।

यस महोत्सवमा पल शाहसहित हास्य कलाकार सिताराम कट्टेल (धुर्मुस), कुञ्जना घिमिरे (सुन्तली), गायकहरु प्रमोद खरेल, प्रकाश सपुत, रामजी खाड, राजु परियार, पशुपति शर्मा, ज्योति मगर, शान्ति श्री परियार, एलिना चौहान लगायतका कलाकारहरुको प्रस्तुति रहने सह-आयोजक कला, संस्कृति, पर्यटन प्रवर्द्धन मञ्चका अध्यक्ष डिल्ली परियारले जानकारी दिए ।
महोत्सव फागुन २८ गतेसम्म सञ्चालन हुने छ ।