हरिवंश भन्छन्- प्रदीपको काममा ढुक्क छु, स्क्रिप्ट नपढि महाजात्राको अफर स्वीकारेँ

काठमाडौँ । मह सञ्चारमा झन्डै डेढ दशक काम गरेपछि फिल्म ‘जात्रा’ मार्फत निर्देशनमा उदाए प्रदीप भट्टराई । उनी अहिलेका जल्दाबल्दा निर्देशकमा गनिन्छन् ।

पहिलो फिल्मबाटै दर्शक र समीक्षकको विश्वास जितेपछि उनले पछाडि फर्केर हेर्नु परेन । उनी हिट निर्देशकका रुपमा दरिएका छन् । जात्रापछि निर्देशक भट्टराईले ‘शत्रु गते’, ‘जात्रै जात्रा’ र ‘महापुरुष’ निर्देशन गरेर आफूलाई बक्सअफिसमा अब्बल सावित गरे । समीक्षकले पनि उनको ‘जात्रा’ शृङ्खलालाई रुचाए ।

निर्देशक भट्टराईले आफ्नो गुरु वा पथप्रदर्शक मान्छन् वरिष्ठ हास्यकलाकार हरिवंश आचार्यलाई । ‘जात्रा’ मा हरिवंशले एउटा गीत गाएका थिए । प्रदीपको दोस्रो फिल्म ‘शत्रु गते’ मह सञ्चारबाटै निर्माण भएको थियो । ‘महापुरुष’ मा अभिनेता आचार्यलाई प्रदीपले मुख्य भूमिकामा लिए । यस चलत्रिबाट हरिवंश राष्ट्रिय चलचित्र पुरस्कारमा उत्कृष्ट अभिनेता बन्न सफल भए । यसपटक ‘जात्रा’ को तेस्रो भाग ‘महाजात्रा’ मा उनी एक राजनीतिज्ञको भूमिकामा देखिदैछन् ।

स्वच्छ र सरल छवीका हरिवंशले यसपटक भ्रष्ट राजनीतिज्ञको चरित्रलाई फिल्ममा प्रस्तुत गर्दैछन् । यसै सन्दर्भमा उनीसँग गरिएको संवादः

तपाईँलाई खराब राजनीतिज्ञको नकारात्मक भूमिका निर्वाह गर्न के कुराले आकर्षित गर्यो ?

म आफूले निर्वाह गरेको भूमिकामा भन्दा फरक गरौँ भन्ने सोच राखेर काम गर्छु । सोही कारण पनि नयाँ र फरक भूमिकामा मेरो प्राथमिकतामा पर्छ । नकारात्मक भूमिकाले पर्दामार्फत सकारात्मक सन्देश पनि प्रवाह गर्छ । यस्तो कार्य वा गतिविधि गर्न हुँदैन भन्ने यसले मनोरञ्जनात्मक शैलीमा ज्ञान समेत दिन्छ । यही कारण पनि म यस भूमिकालाई निर्वाह गर्न सहमत भएको हुँ ।

प्रदीप भट्टराईले निर्देशन गर्नु भएकै कारण विश्वास बढेको हो ?

एउटा कारण प्रदीप पनि हुन् । उनले हामीसँग मह सञ्चारमा लामो समय मुख्य सहायक निर्देशक र निर्देशक भएर काम गरे । उनीसँग दुई फिल्ममा पनि काम गरिसकेको हुँदा म उनको काम प्रति ढुक्क छु ।

मलाई उनले पात्रको बारेमा सुनाएपछि मैले सहमति दिएँ । किनकि उनले कस्तो काम गर्छन् भन्ने मलाई दुई दर्शकदेखि थाहाँ छ । मैले फिल्म गर्छु भन्दा पूर्णरुपमा स्क्रीप्ट पनि पढेको थिइनँ । किनकि उसका कथाले समाजलाई मनोरञ्जनसँगै सन्देश दिईरहेका हुन्छन् । साथै, प्रदीपले फिल्म प्रस्ताव गर्दा नाई भन्ने सायदै होलान् जस्तो पनि लाग्छ ।

‘महापुरुष’ पछि दर्शकको अपेक्षा बढेको छ, त्यसलाई यसले पुरा गर्छ ?

अवश्य गर्छ । किनकि फिल्मको सम्पूर्ण कुरा जोडिएको पात्र म नै हुँ । मेरो नकारात्मक भूमिका दर्शकलाई नयाँ पनि हुनेछ । फिल्ममा महाजात्रा नै मेरो कारणले हुन्छ । मलाई प्रस्ताव गर्दा नै महाजात्रा गराउन तपाइँ चाहिन्छ भन्नु भएको थियो । भूमिका त्यही अनुरुप छ ।

तपाइँले बुझ्नु भएको ‘महाजात्रा’ कस्तो चलचित्र हो ?

जात्राकै शृङ्खला हो । यो रमाइलो छ । यसमा बेरोजगार युवाको समस्या, रोजीरोटीका लागि गरिने सङ्घर्ष, देशमा केही गरौँ भन्ने युवाको दैनिकी, राजनीतिज्ञले युवालाई दिलाउन नसकेको विश्वास लगायतका पक्ष छन् ।

उल्लेखित कुराहरू सिरियस छन्, जसलाई मनोरञ्जनात्मक प्रस्तुतीमार्फत पर्दामा ल्याईएको छ । बेरोजगार युवाहरूले सर्टकट खोज्दा भोग्ने प्रतिस्थिति पनि छ । यो गम्भीर विषयको रमाइलो प्रस्तुती हो ।

तपाइँलाई कुनै भूमिका प्रस्ताव हुँदा के कुरामा बढी ध्यान दिनुहुन्छ ?

मैले फिल्मको विषयवस्तु हेर्छु । त्यसपछि मेरो भूमिकाको कथामा आवश्यकतालाई हेर्छु । अनि फिल्म निर्माण गर्ने टिमले पछिल्ला काम कस्तो गर्नुभएको छ र मलाई कुन किसिमको प्रस्तुतीकरणमार्फत प्रस्तुत गर्दै हुनुहुन्छ, ती सब हेरेर मैले फिल्म गर्ने वा नगर्न निर्णय लिन्छु । यो प्रदीप भट्टराईमा भने लागु हुँदैन, किनकि उनीसँग दुई दर्शक बढी काम गरेकाले म हरेक पाटोमा विश्वस्त हुन्छु ।

फिल्ममा अभिनय गरिरहनुभएको छ, निर्माणको योजना के छ ?

अहिले फिल्म निर्माण भन्दा पनि अभिनयमै केन्द्रित छु । म राम्रो निर्माण समूहसँग काम गर्ने योजना अनुसार अभिनयमै केन्द्रित छु । त्यसैले अहिले निर्माणमा केही समय लाग्छ । अहिले मलाई अभिनेताकै रुपमा पाउनु हुनेछ ।