‘रुमानी रङ्ग’ मा पाँच विदेशी कलाकार खेलाइने, अष्ट्रेलियन नायिका खोजिँदै

काठमाडौं । अभिनेता धिरज मगर र अभिनेत्री साम्राज्ञी राज्यलक्ष्मी शाहको मुख्य भूमिका रहने चलचित्र ‘रुमानी रङ्ग’ मा ५ जना विदेशी कलाकारहरूलाई अभिनय गराइने भएको छ ।

चलचित्रको दोस्रो नायिकामा अष्ट्रेलियन नागरिकलाई छनोट गरिने चलचित्र स्रोतले बतायो ।

हालसम्म २१६ जना अष्ट्रेलियन नागरिकले अनलाइन मार्फत आवेदन दिएको दाबी समेत गरिएको छ । छिट्टै नै २१६ जनाबाट टप १० छानिने र उनीहरूमध्ये एक जनालाई दोस्रो मुख्य अभिनेत्री छनौट गरिने भएको हो । चलचित्रको अष्ट्रेलियाको लाइन प्रोड्युसर कम्पनी डीब्वाइज इन्टरटेनमेन्टले हेर्दै छन् ।

निर्माता तथा प्रस्तुतकर्ता जिएम ठकुरीले अष्ट्रेलियाबाट चाँडै नै सम्पूर्ण कलाकारको छनौट गरिने बताए । यो चलचित्रलाई अनिल योञ्जनले निर्देशन गर्नेछन् । चलचित्रको पटकथा र संवाद पनि उनी आफैँले लेखेका हुन् ।

‘लाखे’ निर्माण गरेको ग्लोबल मिडियाको यो दोस्रो चलचित्र हो । आविष्कार बहुसञ्चार प्रालिको सहकार्यमा यो चलचित्र निर्माण हुँदैछ । यो सिनेमालाई नेपालमा काफिया फिल्मस् र कुबेर सिने फिल्म्सले प्रदर्शन गर्नेछन् ।