दर्शक लोभ्याउने शोभित-जयकिशनको ट्रिकः धेरै हाँस्न नसक्नेले यो चलचित्र नहेर्नुहोला !

काठमाडौं । आफ्नो चलचित्रमा दर्शक लोभ्याउन निर्माता-निर्देशक शोभित बस्नेतले नयाँ ट्रिक लगाएका छन् । उनको होम प्रोडक्सन फिल्म ‘बद्रीबहादुर’ को पोस्टरमै लेखिएको छ- धेरै हाँस्न नसक्नेले यो चलचित्र नहेर्नुहोला ।

विगतमा अत्यधिक संख्यामा चलचित्र बनाउने तर गतिला नबनाउने निर्देशकका रुपमा चिनिन्थे शोभित । पछिल्लो समय भने उनले धेरै चलचित्र निर्देशन गरेका छैनन् । उनले बनाएको चलचित्र ‘डाँडाको वरपिपल’ ले हलमा पानी पनि भन्न पाएको थिएन । अहिले उनले आफ्नै भाइ जयकिशन बस्नेतलाई प्रमुख भूमिकामा खेलाएर ‘बद्रीबहादुर’ निर्माण गरेका हुन् ।

यस चलचित्रमा शोभितका छोरा सलोन बस्नेत र नायिका पुजा शर्मा अतिथि भूमिकामा छन् । छुल्ठिम गुरुङ, राजीव बस्नेत धिरेन शाक्य, वर्षा चौंलागाईं लगायतका कलाकारले पनि अभिनय गरेका छन् । निर्देशक शोभित आफैं पनि चलचित्रमा महत्वपूर्ण भूमिकामा देखिनेछन् ।

आउँदो चैत्र २३ गतेबाट रिलिज हुने यस चलचित्रको एउटा गीत ‘पुलिस दाई’ आज एक कार्यक्रममा प्रिमियर गरिएको छ । गीतमा सलोन र पूजा फिचर्ड छन् । उनीहरुलाई यही गीतमा मात्रै देख्न सकिने छ । गीतमा शिवम् अधिकारीको शब्द रचना, टंक बुढाथोकीको संगीत तथा संगीतकार बुढाथोकी र मिलन नेवारको स्वर सुन्न सकिन्छ ।