जात्रा सिक्वेलमा छोटो भूमिकाबाटै छाप छोडेकी वर्षा, ‘महाजात्रा’ बारे के भन्छिन् ?

अहिलेको व्यस्त र चर्चित अभिनेत्रीमा पर्छिन् वर्षा राउत । करिअरको सुरुवातमै सफल चलचित्रको ह्याट्रिक गरेकी उनले त्यसपछि पछाडि फर्केर हेर्नु परेको छैन ।

सन् २०१६ मा ‘नाई नभन्नु ल’ ४ बाट डेब्यू गरेकी वर्षाले सोही वर्ष ‘छक्का पञ्जा’ र ‘जात्रा’ मा काम गरिन् र तीनवटै चलचित्र हिट भए ।

तीनवटै चलचित्रमा वर्षाको भूमिका लामो थिएन तर उनले बेग्लै छाप छोड्न सफल भएकी छन् । हट र चञ्चल युवतीदेखि जिम्मेवार गृहणीसम्मको भूमिकामा फिट हुन सक्ने खुबी देखाइन् ।

वर्षाको नयाँ चलचित्र ‘महाजात्रा’ दर्शकमाझ आउँदैछ, जुन ‘जात्रा’ को तेस्रो सिक्वेल हो । यो सिक्वेलमा वर्षाले सम्पदा/सम्पूको भूमिकामा अभिनय गर्दै आएकी छन् ।

‘महाजात्रा’ रिलिजको पर्खाइमा छिन् अहिले वर्षा । हरिवंश आचार्यको समेत महत्वपूर्ण भूमिका रहेकाले महाजात्राले दर्शकमा पनि बलियो हाइप बनाइसकेको छ ।

जात्रामा काम गर्दा वर्षाका लागि कार्यकारी निर्माता रवीन्द्रसिंह बानियाँ, निर्देशक प्रदीप भट्टराई र अभिनेता विपिन कार्कीको टीम नयाँ थियो । उनले रवीन्द्रलाई ‘टल्क जङ्ग भर्सेस टुल्के’ मा नोटिस गरेकी थिइन् ।

विपिनको ‘भष्मे डन’ बारे परिचित भएपनि धेरै चिनजान थिएन । प्रदीपको उनले न नाम सुनेकी थिइन् न काम देखेकी । तर, अहिले यो टीम उनलाई परिवारजस्तो लाग्न थालिसकेको छ ।

वर्षासँग ‘जात्रा’ सिक्वेलको सेरोफेरोमा गरिएको संवादः

विपिन कार्की थियटरबाट आउनु भएको कलाकार, तपाईं म्युजिक भिडियोबाट ‘जात्रा’ मा जोडिनुभयो । त्यसबेला काम गर्न कतिको सहजता भएको थियो ?

सुरुमा मैले पनि कसरी काम गर्ने होला ? भन्ने नसोचेकी होइन । तर, फिल्मको लागि भेटघाट भयो । हामीले वर्कशप गर्यौं । प्रेम विवाह गरेको क्यारेक्टर भएकाले हामी बीचमा कुराहरू शेयर गर्न लजाउनु हुँदैन भनेर त्यही अनुसार वर्कशप गर्यौं । त्यसले गर्दा मलाई सेटमा निकै सहज भयो । अहिले त हामी फिल्मी परिवार नै भइसकेका छौँ ।

तपाईंको नजरमा वर्षाको सम्पदा (सम्पु) कस्तो क्यारेक्टर हो ?

सम्पु एउटा असल र इमान्दार महिला हो । त्यही भएर नै उसले फणिन्द्रसँग साधारण पुरुषसँग जीवन बिताउने निर्णय गरेकी हो । प्रेम विवाह गर्न सम्पुलाई फणिन्द्रको इमान्दारिताले आकर्षित गरेको थियो । ‘महाजात्रा’मा अझै संघर्षशील गृहणी बनेकी छ ।

परिवारमा छोरी थपिएसँगै अहिले अरुको घरमा गएर काम गर्ने, आम्दानी बढाउन मेहनत गर्ने गृहणी बनेकी छ । परिवारको लागि सङ्घर्ष गरिरहेकी महिला हो सम्पु भन्नुस् या सम्पदा ।

फिल्ममा तपाईंको प्रेम विवाह भयो तर प्रेम प्रसङ्ग निकै कम छ नि ?

हाम्रो प्रेम कथालाई ‘जात्रै जात्रा’मा देखाइएको थियो । यसलाई दर्शकले पनि रुचाउनुभयो । हाम्रो परिवार नै सङ्घर्षमा छ, जहाँ प्रेमसँगै अन्य विविध पाटोलाई चित्रण गर्नुपर्ने छ । फेरि मूल कथा नै जात्राको हो । त्यसकारण यसमा चाहिने जति प्रेम छ ।

पहिलो फिल्ममा हिरोइन भन्नुभएपछि दोस्रोमा श्रीमती र तेस्रोमा आमा बन्नु भयो । कसरी मिल्यो यस्तो संयोग ?

त्यस्तै भयो । तर, मैले आफूलाई फरक भूमिकामा प्रस्तुत गर्ने सोचसहित नै आएकी थिएँ । म हिरोइनमै सीमित नभई कलाकार बन्ने सोच बोकेर आएको हुँदा पनि मलाई ती भूमिका गर्न हुन्न की भन्ने नै लागेन ।

तपाईंको बुझाईमा ‘महाजात्रा’ के हो ?

‘महाजात्रा’ को एउटा पारिवारिक र सामाजिक फिल्म हो । हामीले देखिरहने घटनालाई यसमा रमाइलो शैलीमा प्रस्तुत गरिएको छ । यहाँ परिवार, मित्रता र समाजको जात्रा छ । भिन्न तीन पृष्ठभूमिबाट आएका पात्रले सिङ्गो नेपालको प्रतिनिधित्व गर्छ । यो स–परिवार हेर्नुपर्ने फिल्म हो ।

डेब्यु वर्षमै तीन सफल फिल्म दिनुभएपछि भूमिकामा फरकपना आएन भन्ने सुनिन्छ नि ?

कुनै पनि कलाकारलाई ‘टाइप कास्ट’ हुन मन हुँदैन । तर, निरन्तरता पनि हाम्रो बाध्यता नै हो । हामीले आइरहेको प्रस्तावमा आफूलाई राम्रो लाग्ने भूमिका छनोट गर्नुपर्छ । केही समय फिल्ममा देखिएन भने फलानो हरायो भनेर खबर आउँछ ।

त्यसैले आफूलाई पर्दामा ल्याइराख्नु पर्ने दबाबसँगै फरक गर्नु पर्ने चुनौती पनि हामी कलाकारलाई हुन्छ । र, मैले पछिल्लो भूमिका भन्दा फरक होस् भने हरेक पटक प्रयास गरिरहेकी हुन्छु ।

कस्तो फिल्ममा देखिन मन छ ?

मलाई कमर्सियल भ्यालू बोकेको आर्ट फिल्ममा देखिन मन लागिरहेको छ । ‘जात्रा’ शृङ्खलाले पनि समीक्षात्मक र व्यावसायिक सफलता पाइरहेको छ ।

मलाई समाजले देखिरहने तर महसुस गर्न नसकेको कथलाई पर्दामार्फत दर्शकसम्म पुर्याउन मन छ । ती पात्रप्रति समाजले निर्माण गर्ने दृष्टिकोण, पात्र भित्रको मनोविज्ञान र जीविकोपार्जनका लागि गरिने सङ्घर्ष आफ्नो पात्रबाट व्यक्त गरौँ भन्ने लाग्छ ।