‘अगस्त्य’ हेरेका बालेन भन्छन्- निर्देशकको सोच र कलाकारको मेहनत प्रशंसायोग्य छ

काठमाडौं । एक्सन–थ्रिलर चलचित्र ‘अगस्त्य च्याप्टर १’ हेर्न काठमाडौँ महानगरपालिकाका प्रमुख बालेन्द्र साह पत्नी सविना काफ्लेसहित हल पुगेका छन्।

रिलिजको दोस्रो सातामा प्रवेश गरेको चलचित्र ‘अगस्त्य’ हेर्न बालेन पत्नीसहित दरबार मार्गको क्यूएफएक्स हल पुगेका थिए। चलचित्र हेरिसकेपछि उनले चलचित्रका लागी कलाकारले गरेको मेहनतको प्रशंसा गरेका छन्।

उनले चलचित्रका निर्देशक सौरभ चौधरीको सोच, कलाकारहरूले गरेको मेहनत र छायांकन पक्षको प्रशंसा गर्दै राम्रो लागेको प्रतिक्रिया दिए। साहले भने,‘नाजिरको ज्यान गज्जबको बनेको रहेछ । उहाँले ज्यान बनाएर आफूलाई पात्रमा ढाल्न मिहिनेत गर्नुभएको छ।’

दोस्रो सातामा चलिरहेको सौरभ चौधरी निर्देशित चलचित्रले दोस्रो सातामा केही कम शोहरु पाए पनि दर्शकको चाप भने घटेको छैन। दर्शकको अकुपेन्सी अझै पनि सुखद नै छ ।

डार्क हर्स इन्टरटेनमेन्ट र सेभेन सिज इन्टरटेनमेन्टको प्रस्तुति रहेको चलचित्रमा सौगात मल्ल, नाजिर हुसेन, मलिका महत, प्रमोद अग्रहरी, विजय बराल, रवीन्द्र झा, बेन बस्नेत, शिशिर वाङ्गदेल, सिम्रन खड्का, प्रकाश दाहाल, गजेन्द्र त्रिपाठी लगायतको अभिनय छ । निर्माण पक्ष यतिबेला ’च्याप्टर २’का लागि उत्साहित छ जसलाई सन् २०२६ भित्र प्रदर्शन गर्ने जनाइएको छ ।