आन्दोलनरत आरती साहका परिवार र गृह मन्त्रालयबीच सहमति, थप अनुसन्धान गर्न सीआईबी खटिने

कठमाडौं । आन्दोलनरत आरती साहका परिवार र गृह मन्त्रालयबीच  पाँच बुँदे सहमति भएको छ । आज उनीहरुबीच सहमति भएसँगै आन्दोलनका कार्यक्रम फिर्ता भएका छन् ।

धनुषा जनकपुर उपमहानगरपालिका–९ थापाचोकका २२ का स्वर्गीय आरती साहका परिवारसँग गृहमन्त्री रवि लामिछाने नै उपस्थित भएर सहमति  गरेका हुन् । आरतीका परिवारघटनाको सत्यतथ्य छानबिन र दोषीउपर कारबाहीको माग राख्दै २०८० असार १ गतेदेखि आन्दोलित थिए । घटनाकाे थप अनुसन्धान गर्न नेपाल प्रहरी केन्द्रीय अनुसन्धान ब्यूरोको टोली खटाउने  सहमति भएकाे छ ।

सहमतिपत्रमा साहको कर्तव्यज्यानसम्बन्धी हाल अदालतमा विचाराधीन मुद्दालाई समेत मध्यनजर गरी प्राप्त हुन जाने थप प्रमाणहरू कानुनबमोजिम अदालतमा पेस गर्नेगरी थप अनुसन्धान गर्न नेपाल प्रहरी केन्द्रीय अनुसन्धान ब्यूरोको टोली खटाउने तथा अनुसन्धान टोलीले मृतक आरती साहको परिवारसँगको समन्वयमा अनुसन्धान गर्ने र कार्य प्रारम्भ गरेको ४५ दिनभित्र प्रतिवेदन पेस गर्नेगरी घटनाको विषयमा अध्ययन गर्ने उल्लेख छ ।

यस्तै अनुसन्धानबाट प्राप्त प्रमाणका आधारमा प्रचलित कानुनबमोजिम पुनः अभियोजनसमेत गर्ने, आरती साहका परिवारलाई राहतस्वरुप आर्थिक सहायता उपलब्ध गराउन गृह मन्त्रालयले आवश्यक, सहजीकरण गर्ने तथा साहका परिवारको तर्फबाट भइरहेको आन्दोलनका कार्यक्रमहरू आजका मितिबाट फिर्ता लिने सहमति भएको छ ।