कवि गणेश श्रमणको एकल कविता वाचन

चितवन । कविता चिन्तन यात्राका अभियन्ता एवम् कवि गणेश श्रमणले एकल कविता वाचन गरेका छन् ।

मंगलबार कवि गणेशले नारायणगढको पूर्वतर्फ भोजाड गाउँमा पुगेर कविता चिन्तन यात्राका क्रममा लेखिएका आफ्ना ६ वटा कविता वाचन गरेका हुन् ।

अभिव्यञ्जना साहित्य प्रतिष्ठानले कवि श्रमणको कविता वाचन र उनको कविता सङ्ग्रह ‘आगो लिएर गाउँ गाउँमा’ को विमर्श कार्यक्रमको आयोजना गरेको हो । कार्यक्रममा कवि गणेशले गाउँमा जेल हुँदैन, देश कसलाई चाहिन्छ ?, भेटिएको अखबार, खोइलको घर, बिरालोले काटेको बाटो, बाथरुममा हतार शीर्षकका ६ वटा कविताहरू प्रस्तुत गरेका थिए।

कवि गणेशले कविता चिन्तन यात्राका क्रममा गाउँ सम्झेर लेखिएका गाउँ केन्द्रित कविताहरू सुनाए । सङ्ग्रहमा ५५ वटा कविता छन् । ती मध्ये धेरै कविताले गाउँलाई सम्बोधन गरेका छन्, गाउँलाई चित्रण गरेका छन् ।

कार्यक्रममा डाक्टर एकनारायण पौड्यालले कृतिको समीक्षात्मक टिप्पणीराखे। नरम र सरल स्वभावका कवि गणेशका कविता पनि नरम र सरल भएको समीक्षक पौड्यालले बताए ।

कार्यक्रममा कवि गोविन्दराज विनोदी , भूपिन, सरिता तिवारी ,नवराज ढुङ्गाना र पदम अर्यालले गणेशका एकएकवटा कविता वाचन गरे । इन्द्र रेग्मी, एलबी क्षेत्री शुभकामना मन्तव्य राखेको कार्यक्रमलाई सुरेन्द्र अस्तफलले सहजीकरण गरेका थिए ।