अमेरिकाले नेपालमा धार्मिक अनास्था फैलाउन करोडौं खर्च गरेको विषयमा छानबिन गर्न राप्रपाको माग

काठमाडौं । राष्ट्रिय प्रजातन्त्र पार्टीका प्रवक्ता मोहन श्रेष्ठले नेपालमा सनातन हिन्दू र बौद्ध धर्मप्रति अनास्था फैलाउन अमेरिकाले करोडौं खर्च गरेको भन्ने विषयमा अनुसन्धान थाल्न सरकारसँग माग गरेका छन् ।

अमेरिकाले नेपालमा धार्मिक अनास्था फैलाउन पाँच लाख अमेरिकी डलर अर्थात ६ करोड ६५ लाख बढी रकम खर्च गरिएको तथ्य उजागर भएपछि उनले संवेदनशीलतालाई ध्यान दिइ उच्च प्राथमिकताका साथ छानबिन थाल्न सरकारकालाई ध्यानाकर्षण गराएका हुन् ।

उनले भनेका छन्, ‘नेपालमा सनातन हिन्दू र बौद्ध धर्मप्रति अनास्था फैलाउन लाखौं डलर खर्च गरिँदै आएको डरलाग्दो खुलासा भएको छ । फ्लोरिडाबाट प्रतिनिधित्व गर्ने सांसद ब्रिआन म्यास्टले अमेरिकी संसदमै यसको खुलासा गरेका छन् । नास्तिकता फैलाउन र पारम्परिक आस्था कमजोर पार्न विदेशी पैसा नेपालमा कहाँ, कसरी, कुन माध्यमबाट कसले परिचालन गरिरहेको छ भन्ने विषयमा आवश्यक छानबिन आवश्यक छ ।’

प्रवक्ता श्रेष्ठले सनातन धर्म संस्कृतिविरुद्ध गतिविधि गर्ने व्यक्ति र संस्थाको पहिचान गरी कानूनबमोजिम कारबाही गर्न सरकारसँग माग गरेका छन् ।

उनी भन्छन्, ‘विषयको संवेदनशीलतालाई ध्यान दिइ उच्च प्राथमिकताका साथ छानबिन थाल्न सरकारको गम्भीर ध्यानाकर्षण गराउँछु ।’