इंग्ल्यान्डविरुद्ध ब्राजिलको जित

काठमाडौं । अन्तर्राष्ट्रिय मैत्रीपूर्ण खेलमा इंग्ल्यान्डलाई उसैको घरमा पराजित गर्दै ब्राजिल विजयी भएको छ । ब्राजिलले घरेलु टोली इंग्ल्यान्डमाथि १–० को जित निकालेको हो । जितमा ब्राजिलका युवा खेलाडी एन्ड्रिकले गोल गरे ।

ब्राजिलको लागि तेश्रो अन्तर्राष्ट्रिय खेल खेलेका उनले ब्राजिलबाट सबैभन्दा कान्छो उमेरमा अन्तर्राष्ट्रिय गोल गर्ने कीर्तिमान पनि बनाए । एन्ड्रिकले १७ वर्ष २४६ दिनमा गोल गर्दै कीर्तिमान बनाएका हुन् ।

७१औं मिनेटमा मैदान छिरेका एन्ड्रिकले ८०औं मिनेटमा गोल गर्दै ब्राजिललाई १–० को जित दिलाए र ब्राजिलको पछिल्लो चार खेलको जित विहिन यात्राको अन्त्य गरिदिए ।