भरतपुरमा समीक्षाको होली हंगामा : पल शाहको नाम लिँदै चिढ्याउने दर्शकलाई स्टेजबाटै दिइन् चेतावनी

काठमाडौं । अहिलेकी हटकेक गायिका समीक्षा अधिकारी हिजो फागु पूर्णिमाका दिन चितवनवासीमाझ प्रस्तुत भइन् । भरतपुरमा आयोजित ‘टुबर्ग होली हंगामा’ कार्यक्रममा उपस्थित भएकी उनले आफ्ना हिट गीतहरू गाउँदै दर्शकलाई झुमाएकी थिइन् ।

एक दिनअघि दाङमा दर्शक अभावले कार्यक्रम रद्द गर्नुपरेको तितो अनुभव बोकेर चितवन आएकी थिइन् समीक्षा । यहाँ भने उनलाई दर्शकको बलियो साथ मिल्यो । उनले पनि खुलेर आफ्नो प्रस्तुति दिइन् ।

त्यसो त यो कार्यक्रममा पनि एकाध दर्शकले उनलाई अपमानित गर्ने प्रयास नगरेका होइनन् । समीक्षाले गीत गाउनुअघि दर्शक दीर्घाको अघिल्लो लहरमा बसेका एक जनाले लगातार ‘पल शाहको नाम लिएर चिच्याउँदै उनलाई इरिटेड पार्ने कोसिस गरे । सुरुमा नजरअन्दाज गरेकी समीक्षा केही नलागेपछि मुख खोल्न बाध्य भइन् ।

आफूलाई होच्याउन खोज्ने दर्शकलाई उनले औँलाले इशारा गर्दै माइकबाटै भनिन्, ‘मेरो गीत मन पर्दैन भने नहेर्नुस्, तर धेरै बढी पनि नहुनुस् है हजुर ।’

समीक्षाको यस्तो चेतावनीपछि भने ती दर्शकको बोली बन्द भयो । त्यसपछि समीक्षाले आफ्नो हिट नम्बर ‘कुरा बुझ्न पर्च’ गाएर दर्शकलाई मनोरञ्जन गराएकी थिइन् ।