ट्रेलरबाट तारिफ पाएको ‘द रेड सुटकेस’ क्यूएफएक्समा नचलाइने, असहिष्णु व्यवहार भएको निर्माताको गुनासो

काठमाडौं । फरक धारमा बनेको चलचित्र ‘द रेड सुटकेस’ नेपालको सबैभन्दा ठूलो मल्टिप्लेक्स चेन क्यूएफएक्समा प्रदर्शन नहुने भएको छ । सो हलले असहिष्णु व्यवहार गरेको भन्दै चलचित्र निर्माताले यस्तो घोषणा गरेका हुन् ।

आइसफल प्रोडक्सन प्रालीका तर्फबाट निर्माता रामकृष्ण पोखरेलले एक विज्ञप्ति जारी गर्दै क्यूएफएक्सले चलचित्रमाथि विभेद र असहिष्णुता प्रदर्शन गरेको आरोप लगाएका छन् । अन्य चलचित्रहरूको चापले गर्दा द रेड सुटकेसलाई पर्याप्त शो दिन नसकिने पत्र क्यूएफएक्सबाट आएको उनको भनाइ छ ।

क्यूएफएक्सबाहेक सबै चलचित्रको प्रदर्शन निर्धारित मिति चैत ३० मा नै हुने उनले जानकारी दिएका छन् ।

विज्ञप्तिमा भनिएको छ, ‘प्रदर्शनको संघारमा क्युएफएक्सले ‘द रेड सुटकेस’ लाई अन्य देशी–विदेशी फिल्मको चापका कारण उचित सो दिन नसकिने र अर्को हप्ता रिलिज गरे पुनर्विचार गर्न सकिने आशयको इमेल लेखेपछि हामीले यसलाई आपत्तिजनक मान्दै क्युएफएक्स चेनमा चलचित्र प्रदर्शन नगर्ने घोषणा गरेका छौँ । यो निर्णयले दर्शकमा पर्न जाने असुविधाप्रति हामी हृदयदेखि नै क्षमा चाहन्छौं । योबाहेकका सिनेमा घरमा भने चलचित्र निर्धारित मितिमा नै प्रदर्शन हुने जानकारी गराउन चाहन्छौँ ।’

‘देशलाई चलचित्रको माध्यमबाट संसारभर प्रतिनिधित्व गर्ने ’द रेड सुटकेस’ जस्ता चलचित्रमाथि नेपालमा व्यापारको नाममा हुने विभेद नयाँ होइन । यसअघि पनि हाम्रो निर्माण रहेको ’ऐना झ्यालको पुतली’ माथि पनि विदेशी फिल्म सेन्सर नभएको झोकमा निर्धारित समयमा बुकिङ खोलिएको थिएन । कलात्मक चेतमा निर्माण भएका यस्ता फिल्मलाई व्यापार नगर्ने फिल्मको लेबल लगाएर बारम्बार निरुत्साहित गर्दै आइरहेको सूची लामो छ । चाडपर्व र बिदाका समयमा यस्ता फिल्मलाई प्रदर्शनको मौका नदिएर नजानिँदो गरी सिनेमा घरले फरक धारका फिल्म दर्शकको रुचिमा पर्दैनन् भन्ने भाष्य निर्माण गरिरहेका छन् । हामी यस्ता असहिष्णु व्यवहारको भद्र अवज्ञा गर्न चाहन्छौँ,’ विज्ञप्तिमा भनिएको छ ।

द रेड सुटकेस विश्व प्रतिष्ठित भेनिस फिल्म फेस्टिभलमा वर्ल्ड प्रिमियर भएर विश्वका अन्य प्रतिष्ठित फेस्टिभलमा पुरस्कृत छ । चलचित्रको ट्रेलरले पनि निकै तारिफ पाइरहेको छ ।