सदनमा कांग्रेसको अवरोध कायमै, सत्ताधारी सांसद पनि उठे

काठमाडौं । प्रतिनिधिसभाको बैठक अवरुद्ध भएको छ । सहकारी प्रकरणमा उपप्रधान एवं गृहमन्त्री रवि लामिछानेमाथि संसदीय समिति बनाएर छानबिन गर्नुपर्ने अडानमा आज पनि कांग्रेसका सांसद उभिए ।

समिति नबनेसम्म सदन नचल्ने कांग्रेसले अडान लिएपछि सत्तापक्षका सांसदहरूले पनि विनाप्रमाण छानबिन समिति गठन गर्न नमिल्ने जिकिर गरेका छन् ।

कांग्रेस सचेतक सुशीला थिङले करोडौं सहकारीको रकम दुरुपयोग, अपचलन र ठगीमा सरकारका मन्त्री नै संलग्न गरेकाले संसदीय छानविन समितिमार्फत छानबिन नगरेसम्म प्रतिनिधिसभा बैठक चल्न नदिने बताइन् ।

त्यसपछि सभामुखले रास्वपा सांसद मनिष झालाई बोल्न समय दिएका थिए । तर, कांग्रेसले बोल्न दिएन । त्यसपछि सभामुखले सबैलाई सदन चलाउन आग्रह गरेपनि दुवै पक्षका सांसद उठिरहेका छन् ।