एमालेका कोशी प्रदेश अध्यक्ष खतिवडालाई केन्द्रीय संगठन विभागको सचेत पत्र

विराटनगर । नेकपा एमालेको केन्द्रीय संगठन विभागले कोशी प्रदेश कमिटी अध्यक्ष घनश्याम खतिवडालाई ओखलढुंगा जिल्ला अधिवेशनमा पक्षधरता देखाएकोमा लिखितरुपमा सचेत गराएको छ ।

गत चैत २६ गते आयोजित एमाले ओखलढुंगाको जिल्ला अधिवेशनका बेला निश्चित व्यक्ति र समूहलाई फाइदा हुनेगरी प्रदेश अध्यक्ष खतिवडासहितले जिल्ला कमिटी सदस्य,गाउँपालिका कमिटी अध्यक्षसहितका जिम्मेवार  ६ जना नेताको सदस्यता नविकरणलाई मान्यता दिएको थिएन ।

माओवादीबाट एमालेमा समाहित भएका नेता खड्ग कार्कीसहित ६ जनाको सदस्यता नविकरण छुटेकोमा तत्कालीन जिल्ला कमिटीको अनुरोधमा संगठन विभागले गत कात्तिकमै नविकरण प्रमाणित गरेर पठाएको थियो ।

तर अधिवेशनमा उनीहरुलाई सहभागी हुन नदिने नियतले प्रदेश अध्यक्ष खतिवडा, जिल्ला इन्चार्ज खगेन्द्र राईसहित अध्यक्ष मण्डलले केन्द्रीय संगठन विभागको पत्रलाई समेत मान्यता नदिई ६ जनाको सदस्यता अश्वीकृत गरेको विषय केन्द्रमा पुगेको हो ।

विभागले जिल्ला अधिवेशनकै बेला पनि उनीहरुको सदस्यता नविकरण प्रमाणित भएको पत्र पठाएको थियो । संगठन विभागको पत्रलाई अश्वीकार गर्दै जिल्ला अधिवेशनमा केही पार्टी सदस्यहरुलाई सहभागी हुन नदिएको भन्दै प्रदेश अध्यक्षलाई सचेत पत्र पठाइएको हो ।

नविकरण भएर सदस्यता स्थानान्तरण समेत भई गएका सदस्यहरुलाई जिल्ला अधिवेशनको प्रक्रियामा सहभागी हुन नदिइएको विषयमा जानकारी आएको विभागका प्रमुख काशिनाथ अधिकारीले पठाएको सचेत पत्रमा उल्लेख छ ।

विभागले आउने दिनमा यस्तो कमी नरहोस् भन्दै सचेत गराएको हो । जिल्ला अधिवेशनमा विभागको निर्देशन समेत अटेर गरिएपछि तत्कालीन अध्यक्ष शंकर कटुवालले पार्टी नै परित्या गरिसकेका छन् ।

याे पनि पढ्नुहाेस् –